Inuit innarluutillit illersuisuat Sisimiuni allaffeqarfeqassaaq

Inatsisartut pingasunngornermi maajip 24-ani Inuit Innarluutillit Illersuisuat pillugu Naalakkersuisut inatsisissatut siunnersuutaat juunip aallaqqaataanit 2017-imiit atuutilersussatut akueraat.

Inuit innarluutillit illersuisuanut toqqammavinnik inuit innarluutillit pillugit inuiaqatigiinni pisinnaatitaaffinnik soqutigisaannillu siuarsaasinnaasunik pilersitsinissaq inatsimmi siunertaavoq.

Inuit innarluutillit pisinnaatitaaffiisa soqutigisaasalu qularnaarnissaat siuarsarnissaallu Inuit innarluutillit illersuisuata suliassarissavai, matumanilu inuit innarluutillit atugarisaat Inuit innarluutillit pisinnaatitaaffii pillugit FN-ip isumaqatigiissutaanut naapertuunnersut nalilersortassallugu.

Taamatuttaaq atugassarititanut, pisinnaatitaaffinnut inuillu innarluutillit naammagittaalliuteqarsinnaaneranut tunngasunik inunnut innarluutilinnut, paaqqinnittarfinnut namminersortunik pisortanillu pigineqartunut kiisalu kattuffinnut inuinnarnullu Inuit innarluutillit illersuisua siunnersuisassaaq ilitsersuillunilu.

Taakkua saniatigut Inuit innarluutillit illersuisuata inuit innarluutillit atugassarititaannik ilisimasat katersussavai, ineriartortillugit ingerlateqqillugillu kiisalu inuiaqatigiinni innuttaasut innarluutillit pillugit ilisimasat qaffassarniarlugit suliaqassalluni. Inuit innarluutillit illersuisuat tamanut ammasumik oqallinnermi inuit innarluutillit sinnerlugit oqaaseqartartuussaaq kiisalu inuit innarluutillit oqallinnermut ilaanissaannut periarfissaqarluarnissaat malitsigisaanillu inuiaqatigiit ineriartorneranni sunniuteqarsinnaanerat sulissutigissallugu.

Inuit innarluutillit illersuisoqarfiat Sisimiunut inissinneqassaaq. Taama aalajangernermut tunngaviuvoq Inunnik Innarluutilinnik Sullissivissaq, maanna sanaartorneqartoq, aamma Sisimiuniimmat, ilisimasanillu avitseqatigiissinnaanissamut periarfissiilluassalluni.
Aalajangerneq aamma sumiiffimmi ataatsimi aqutsiveqarfiit eqiterunnaveersaarneqarnissaannut sineriammilu tamani suliffeqarfinnik pilersitsinissamut qulakkeerinninnissamut Naalakkersuisut kissaataannut naapertuuppoq.

”Inuit innarluutillit illersuisoqarfianik pilersitsinissamut inatsit Inatsisartunit akuerineqarnera Naalakkersuisut assut nuannaarutigaat. Inuit innarluutillit pisinnaatitaaffii pillugit FN-ip isumaqatigiissutaa atoruminartumik innuttaasunullu qanilaartumik atuutilernissaata qulakkeerneqarnissaa Naalakkersuisut assut aamma pingaartippaat. Kalaallit Nunaanni innarluutillit atugarisaasa patajaallisarnissaannut sullissilluarsinnaasumik ilisimasaqarluartumillu naalakkersuinermut attuumassuteqanngitsumik Innarluutilinnut illersuisumik pilersitsinissaq siunertaavoq."

Isumaginninnermut, Ilaqutariinnermut, Naligiissitaanermut Inatsisinillu atuutsitsinermut Naalakkersuisoq, Sara Olsvig taama oqarpoq nangillunilu

“Sisimiuni inissiinermi inuit innarluutillit pillugit ilisimasatigut katersuuffeqarnissamut periarfissiilluassaagut, Inunnik Innarluutilinnik Sullissivissaq ukiamut ammarneqartussatut naatsorsuutaasoq aamma Sisimiuniittussaammat. Taama iliornikkut pisortat suliffeqarfiutaannik nutaanik pilersitsiniermi ilisimasatigut katersuuffissamik pilersitsiniarneq aammattaaq sumiiffinni nutaani pisortat suliffeqarfiutaannik pilersitsineq Naalakkersuisunit kissaatigaarput”.

Annertunerusumik paasisaqarusukkuit naalakkersuisup allattaa Nina Jul Larsen attavigiuk: nina@nanoq.gl