Meeqqat eqeersimaartut pujortannginnerusarput

Sapaatip akunnera 22 tassaavoq pujortarfiunngitsoq. Peqqissutsimut Naalakkersuisoqarfimmit angajoqqaanut inersimasunullu imatut nipilimmik siunnersuuteqartoqarpoq: Meeqqat sunngiffimmi tapersersoruk taamaaliornikkut meeqqavit peqqinnartumik pujortarfiunngitsumik inuuneqarnissaa tapersersussavat.

Ilaatigut Island-imi misilittakkat takutippaat inuusuttut sunngiffimmi sammisassaqarluarlutik aallutaqaraangamik pujortartalernissaat, imigassamik ikiaroornartunillu atuilernissaat pinaveersaartinneqartartut.

-” Ilaatigut meeqqatsinnut inuusuttortatsinnullu pitsaasumik iliuuserisinnaasavut tassaapput pujortarfiunngitsumik inuuneqarnermik tapersersuineq. Taamatut iliuuseqarsinnaavugut meeqqavut sammisaqaqatigineratigut sunngiffimmilu sammisaqarnissaanik tapersersornerisigut,” taama oqarpoq Peqqissutsimut Naalakkersuisoq, Agathe Fontain, nangillunilu:

-”Pujortartariaatsit inuusuttuunermit siusissukkut aallartittarput. Taamaattumik nuannaarutissaavoq 2014-mit meeqqat atuartut peqqissusaannik misissuititsinerup takutimmagu inuusuttut pujortartartut ikiliartortut. Ataatsimut kattulluta inuusuttortatta pujortalinnginnissaat anguniarlugu tapersersortigit taamaasilluta ineriartorneq pitsaasoq ingerlatiinnarsinnaassagatsigu.”

Sapaatip akunnera 22-mut tunngatillugu najukkani aaqqissuisoqassaaq pujortartalinnginnissamik ukkassinertalinnik. Peqqissutsimut Naalakkersuisoqarfik kommunini pitsaaliuinermut siunnersortinut atortussanik nassiussinikuuvoq sapaatip akunnera malunnartinniarlugu atugassanik. Atortussat qungasequtinik imaqarput ilaqutariit nunamukaqatigiinnerminni atorsinnaasaannik ilaqutariinnullu ullorsiutinik imaqarput ilaqutariit sammisassaqarnissaanut atorneqarsinnaasunik.

Pujortartaruit sapaatip akunneralu atorlugu pujortarunnaarusukkuit, Peqqik.gl aqqutigalugu akeqanngitsumik sms atorlugu kiffartuussivik massakkorpiaq ilannguffigisinnaavat!. Aamma sumiiffinni pinaveersaartitsinermut siunnersorti attavigisinnaavat pujortarunnaarniarnermi peqataaneq pillugu tusarniaavigalugu.

Sapaatip akunnera 22 pillugu www.peqqik.gl atorlugu paasiniaagit.


Annertunerusumik paasisaqarusukkaanni attavigineqarsinnaavoq naalakkersuisumut allatsi Nauja Møller, mobil: +299 58 26 54 imaluunniit e-mail: nmoe@nanoq.gl.