Inoqarfiit minnerit ataatsimeersuassutigineqalerput

Nunatsinni inoqarfiit minnerit pillugit marlunngornermi maajip 30-anni pingasunngornermilu maajip 31-anni Nuummi ataatsimeersuartitsisoqassaaq.

Ataatsimeersuarneq taanna Kommuninut, Isorliunerusunut, Attaveqaqatigiinnermut Ineqarnermullu Naalakkersuisoqarfimmiit aaqqissuunneqartoq Naalakkersuisuni ilaasortamit, Erik Jensen-imit pisortatigoortumik ammarneqassaaq. Tamatumalu kingorna Inuussutissarsiornermut, Suliffeqarnermut, Niuernermut, Nukissiuuteqarnermut Naalakkersuisoq, Hans Enoksen, aamma Kalaallit Nunaanni Nunaqarfiit Peqatigiiffianni, KANUNUPE-mi, siulittaasoq Jens Kristian Therkelsen ammaanersiornermut atatillugu oqaaseqassapput.

Inoqarfiit minnerit ataatsimeersuassutigineqarneranni oqaluuserineqartussat qulequttanut pingaarnernut pingasunut agguataagaapput. Siulleq tassaavoq ”Siunissami nunaqarfiit inoqarfiillu minnerusut”. Qulequttap taassuma sammineqarnerani Naalakkersuisut siulittaasuat Kim Kielsen avatangiisinut tunngassuteqartut pillugit siulliulluni oqalugiaateqassaaq.

Inuussutissarsiornermik, pilersuinermik namminersortullu suliffiutaasa ineriartornissaannik periarfissagissaartitsinissaq qulequttat pingaarnerit aapparissavaat. Qulequttap taassuma sammineqarnerani Center for Arktisk Teknologimiit aamma KNI A/S-imiit saqqummiunneqartut aallaavigalugit oqallittoqassaaq.

Ataatsimeersuarneq ullup aappaani nanginneqarpat meeqqat inuusuttullu inuuniarnikkut atugaasa toqqissisimanartuullutillu ineriartorfigiuminartuunissaat pingaarnertut qulequtaritinneqassaaq, saqqummiunneqartussani siullerni marlunni ilinniartitaanerup nunaqarfinni piorsaavigineqarnissaanut tunngasuussammata. Aamma isumaginninnikkut nunaqarfinni suliniutit pillugit Isumaginininnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq, Sara Olsvig oqalugiaateqassaaq.

Ataatsimeersuarnerup ulluni marlunni ingerlanneqarnerani oqalugiaatigineqartussat aallaavigalugit ataatsimeersuarnermi peqataasut suleqatigiikkuutaarlutik oqallitsinneqareerunik innersuussutissanik saqqummiussaqartinneqartussaapput.

Inoqarfiit minnerit ataatsimeersuartinneqarnissaanni pilersaarut, oqalugiaatit saqqummiussallu takukkit.  

 

Ataatsimeersuartitsinissaq pillugu sukumiinerusumik paasisaqarusuttut Nunami Namminermi Pissutsinut immikkoortortaqarfiup pisortaa Martha Abelsen attavigisinnaavaat, oqarasuaat: 55 61 39, imaluunniit e-mailikkut: maab@nanoq.gl