Kalaallit Nunaata uuliaqarsinnaanera Londonimi nittarsaanneqartoq

Aatsitassanut Ikummatissanullu Naalakkersuisoq Múte Bourup Egede ulloq 24. maj Kalaallit Nunaata uuliasiornermut periarfissai nittarsaakkiartorlugit Londonimiippoq.

Angalanermut siunertaavoq 2017-ip naanerani Qimusseriarsuarmi, Davis Strædemilu 2018-imi uuliasiorfissanik neqeroortitsinissap nittarsaanneqarnissaa. Aatsitassanut Ikummatissanullu Naalakkersuisoq pilerisaarilluni nittarsaasseqataavoq, uuliasiortitseqatigiiffiillu soqutiginnittut neqeroortitsinissat pillugit paasissutissinneqarput kiisalu uuliasiornermut periarfissanik nalinginnaasunik paasissutissinneqarlutik. Nittarsaassineq Nunarsuarmi uuliasiortitseqatigiiffissuit arlallit peqataaffigaat. 

Aatsitassanut Ikummatissanullu Naalakkersuisup oqalugiarnermini erseqqissaatigaa, Kalaallit Nunaat uuliasiornermut aningaasaliiumasunut uuliasiortitseqatigiiffinnullu uuliasiornissamik kissaateqartunut ammasoq. Peqatigisaanillu erseqqissaatigaa uuliasiornermik suliniutit pinngortitamik inuiaqatigiinnillu qajassuartumik ingerlanneqassasut. 

Aatsitassanut Ikummatissanullu Naalakkersuisoqarfimmit aallartitat Naalakkersuisoq angalaqatigaat. Ujarassiuut Aatsitassanut Ikummatissanullu Naalakkersuisoqarfimmeersut nittarsaassinermi arlalinnik saqqummiipput. Taakkulu nunap sananeqaataa Kalaallillu Nunaanni uuliamik nassaarnissamut periarfissat ilisimatitsissutigaat.

Nittarsaassinermik aaqqissukkamut atatillugu Aatsitassanut Ikumatissanullu Naalakkersuisoq ima oqaaseqarpoq:

“Nunatsinni nunap sananeqaataanik ilisimasanik siaruarterinissarput pingaaruteqarpoq. Aningaasaliisinnaasut uuliasiortitseqatigiiffiillu arlallit Kalaallit Nunaata iluaqutigineqanngitsunik uuliaqarfissuaqarsinnaaneranik eqqummaariffeqalernissaat tamatuma nassatarissavaa. Taamaammat nuannaarutigaara nunarsuarmi uuliasiortitseqatigiiffissuit arlallit Londonimi nittarsaassinitsinni peqataammata.”


Annertunerusunik paasisaqarumallutit ukununnga attaveqarit:

Jane Petersen Lantz  
Naalakkersuisup allattaa
Aatsitassanut Naalakkersuisoqarfik tlf
Mobil +299 597909, e-mail: japl@nanoq.gl

Jørgen T. Hammeken-Holm  
Naalakkersuisoqarfiup pisortaa
Aatsitassanut Naalakkersuisoqarfik
Oq.: 346846, e-mail: joeh@nanoq.gl