Immami uumasut najugaat allanngoriartorput

Issittumi immami uumassuseqassutsip assigiinngissitaarnera pillugu nalunaarusiaq nutaaq saqqummerpoq, tassanilu allassimavoq uumasut pingaarutillit assigiinngitsut najugaat allanngoriartortoq. Nalunaarusiamittaaq ilaavoq issittumi uumassuseqassutsip nakkutigineqarnerata killiffia, siunnersuutinillu imaqarluni Kalaallit Nunaat nunallu issittumiittut allat qanoq ilillutik nakkutigiginninnertik tulluarsarsinnaaneraat, taamaalilluni siunissami silap allanngoriartornera qanoq ililluni uumassuseqassutsip ataqatigiinneranut sunniisarnersoq ersarinnerusumik paasineqarsinnaaniassammat.

Sapaatip akunnera kingulleq ilisimatuussutsikkut nalunaarut saqqummiunneqarpoq, tassanilu allaaserineqarput “Issittumi immami uumassuseqassutsip assigiinngissitaarnerata killiffia”. Ataatsimut oqaatigalugu nalunaarusiap inerniliussaraa, uumasut najugaqarfigisaallu allanngoriartortut.

Nalunaarusiamittaaq allaaserineqarpoq uumasut siaruarnerat allanngoriartortoq, taamaalilluni issittumi uumasut suli avannarparteriartuinnarlutik. Taamatuttaaq uumasut kujasinnerusumi uumasuusartut issittumut appakaakkiartuaartut.

Immap sikuata nungukkiartuaarnerata kinguneranik immap uumasui immikkut eqqugaapput. Siunissamilu uumasunut taakkununnga pissutsit ajorsiartuinnalissangatinneqarput.

Nalunaarusiami aamma eqqaaneqarpoq silap allanngoriartornera ilutigalugu akornusersuutit inunnit pilersinneqartut amerliartortut issittumi pinngortitamut sunniuteqartut.

Nakkutiginninnerup pitsanngorsarneratigut imaluunniit tulluarsarneratigut immami uumasunut pissutsit allanngornerisa taamaalillunilu uumassuseqassutsip ataqatigiinneranut pissutsit allanngornerisa qanoq pingaaruteqartiginerinut apeqqutit akissutissaqartinngikkallagut akissutissarsisinnaagigut nalunaarusiami allassimavoq.

Silap allanngoriartornerata kinguneranik pinngortitap allanngoriartorneranut ilisimasat amerlisarnissaat Naalakkersuisut pingaartippaat. Taamaaliorniarnermi issittumi suleqatigiinneq pingaaruteqarluinnarpoq, uumasunut pinngortitamullu nunap killeqarfii apeqqutaanngimmata taamaammallu nunat pineqartut akornanni ataqatigiissaakkamik suliniuteqarnissaq pisariaqarluni.

Nalunaarusiaq pillugu
Nalunaarusiaq tuluttut suliaavoq Issittumi Siunnersuisoqatigiit ataanni suleqatigiissitamit uumassuseqassutsip assigiinngissitaarneranut suliaqartartumit (Conservation of Arctic Flora and Fauna (CAFF))-imit, suleqatigiissitap programmiani uumassuseqassutsip assigiinngissitaarnerata nakkutigineqarneranut atatillugu (Circumpolar Monitoring Programme (CBMP)). Pinngortitaleriffik Aarhusillu Universitetia suleqatigiillutik nakkutiginninnerup sulinera USA peqatigalugu siuttuuffigaat, taamaalillunilu ilisimatuut nunatsinneersut Danmarkimeersullu nalunaarusiap suliarinerani peqataalluinnarput.

Nalunaarusiap saniatigut CAFF naalisakkamik allanillu paasissutissanik nalunaarusiamut tunngassuteqartunik saqqummersitsipput, taakkulu CAFF-ip nittartagaani atuarneqarsinnaapput http://www.arcticbiodiversity.is/marine

Paasisaqarnerorusukkuit immikkoortortami pisortaq Camilla Østbirk, mail caos@nanoq.gl, telefon 346019 attavigisinnaavat.