Naalakkersuisut Tasiilami mittarfiliornissaq taamaatinngilaat

Sermitsiaq.ag-p allaaserisaanut naqqiut

Sermitsiap internetikkut aviisiagut ulloq 16. maj 2017 allassimavoq ”Tasiilami mittarfiliortoqanngikkallassaaq”. Sermitsiap allaaserisaminut najoqqutaraa Inatsisartut Upernaakkut Ataatsimiinneranni Oqaluuserisassaq nr. 65-imut ”Tasiilami timmisartunut suluusalinnut mittarfissap ingerlatseqatigiiffiup suliassaanut
ilaaqqullugu Kalaallit Airports A/S-mut nalunaaruteqaqqullugit Naalakkersuisut
peqquneqarnissaannik Inatsisartut aalajangiiffigisassaattut siunnersuut”-mut Naalakkersuisut akissuteqaataat.

Naalakkersuisoq Erik Jensen ima oqaaseqarpoq:

Naalakkersuisut Tasiilami mittarfiliornissaq taamaatinngilaat. Akerlianik Naalakkersuisut Tasiilami mittarfiliornissaq siuarsarusuppaat. Naalakkersuisut isumaqanngillat suliniut taanna Kalaallit Airports A/S-ip ataanut inissinneqarpat Tasiilami mittarfiliornissaq siuarsarneqassasoq.

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik Tasiilami Mittarfiup pilersinnissaanut misissueqqaarnerit ingerlatileruttorpai. Mittarfiup sumut inissinnissaanut siunnersuutit suliarineqaleruttorput. Inissiinissaq akuerineqarpat pilersaarusiorneq inaarutaasoq pisinnaalissaaq. Taamaammat Tasiilami mittarfimmik pilersitsinissaq sanaartornertut suliarineqarpoq, taamaattuni sumut inissiinissaq pilersaarusiornerlu siulliunneqartaramik, aatsaallu kingorna suliniutip qanoq akeqarsinnaaneranut missingersuusiorneq suliarineqartarluni. Taamaammat Tasiilami mittarfiliornissap Kalaallit Airports A/S-ip ataanut inissinneqannginnissaa ima isumaqartinneqarsinnaanngilaq Tasiilami mittarfiliornissaq Naalakkersuisunit siuarsarumaneqanngitsoq. Naamerluinnaq.”

Tusagassiorfinnut nalunaarut manna pillugu allanik apeqqutissaqartoqaruni naalakkersuisumut allattaagallartoq Elisabeth Fleischer telefonnr. 56 41 11-mut attaveqarfigineqarsinnaavoq.