Olsvig-p Issittumi Inatsisartut Ataatsimiititaliaat naapippai

Naalakkersuisoq Sara Olsvig Naalakkersuisut siulittaasuannut tullersorti siullertut Issittumi Inatsisartut Ataatsimiititaliaat ullumikkut naapippai. Ataatsimiinnermi Olsvig-p Nunatsinni politikkikkut pissutsit ilisaritippai. Issittumi Inatsisartut Kangerlussuarmi Sisimiunilu ulluni makkunani ataatsimiipput.

Ataatsimiititaliap Olsvig Naalakkersuisut siulittaasuannut tullersorti siullertut Nunatsinni politikkikkut pissutsit pillugit oqalugiaqqullugu qaaqqusimavaat.

"Issittumi suleqatigiinneq immikkuullarissuullunilu pingaaruteqartuuvoq. Nunanit assigiinngitsuneersuugaluarluta unammilernartunik tamatsinnut atuuttunik eqqartuisarnissarput pingaaruteqarpoq. Nuannaarutigaara Nunatsinnut tunngasunik oqaaseqarnissannut periarfissinneqarama" Naalakkersuisoq Sara Olsvig oqarpoq nangillunilu:

"Issittumi silap pissusiata allanngoriartornera, angallanneq, isumaginninnermut peqqissutsimullu tunngasut, takornariaqarneq inuussutissarsiornermillu siammasinnerusumik ineriartortitsineq pillugit unammillernartumik tamatta inissisimavugut ataatsimoorlutalu suliniuteqarutta pitsaanerpaamik angusaqarsinnaavugut. Tamatumani Issittumi Inatsisartunut ilaasortat oqaloqatigilluarnissaat pingaaruteqarpoq".

Issittumi Inatsisartut Ataatsimiititaliaat issittumi naalagaaffinnit arfineq pingasuusunit ilaasortaqarpoq ilaatigullu Nunat Avannarliit Killiit Siunnersuisoqatigiivinit Nunallu Avannarliit Siunnersuisoqatigiivinit alaatsinaattoqarlutik.

Ataatsimiititaliap Kangerlussuarmi ataatsimiinnerani Ruslandimit, Canadamit, Finlandimit, Sverigemit, Islandimit, Savalimmiunit Danmarkimiillu peqataasoqarpoq.

Paasissutissat allat naalakkersuisut allattaanut saaffiginnilluni pissarsiarineqarsinnaapput: Nina Jul Larsen, oqarasuaat 53 93 71.