Issittumi nunat pingaarutilimmik ilisimatusarnermut isumaqatigiissusiortut

Fairbanksimi maj-ip aqqarngani Issittumi Siunnersuisooqatigiinni ministerit ataatsimiinneranni nunat issittormiut Issittumi Siunnersuisooqatigiit isumaqatigiissummik pituttuisumik atsioqatigiipput. Namminiilivinnermut, Nunanut Allanut Nunalerinermullu Naalakkersuisoq, Suka K. Frederiksen, Kalaallit Nunaat sinnerlugu atsiortuuvoq.

”Isumaqatigiissut ilisimatusarnikkut suleqatigiinnissamut pingaarutilimmik kinguneqarluartussamillu ineriartortussamik alloriarneruvoq. Ilisimatusarnermut tunngaviliineq inuiaqatigiitsinnut pitsaasumik kinguneqartussaq. Kalaallit Nunaanni isumaqatigiissutip eqqunneqarluni atulernissaa Issittumilu nunat suleqatiginerulernissaat qilanaaraarput.”

Naalakkersuisoq Suka K. Frederiksen ministerit ataatsimiinneranni ilanngussivoq, Issittumi innuttaasut pingaaruteqassusaat naqissuserlugu: 

”Taamaattumik pingaarnerpaatut suliassaraarput – uagut, Issittumi angerlarsimaffeqartutut – sumiiffitsinni ineriartornermut oqaloqatigiinneq aqussallugu. Issittumi Siunnersuisooqatigiit oqalliffimmi siuttuupput, aallartitani nunat inoqqaavi peqataallutik tamannalu tulluusimaarutissaraarput.”

Ministerit Fairbanksimi Nalunaarut, amerikamiut siulittaasuuffeqarneranni sisamanik qulequtaqartumi; immami isumannaassuseq aqutsinerlu, inuuniarnikkut pitsanngorsaaneq, silaannaap allanngoriartornera Issittumilu Siunnersuisooqatigiit nukittorsarnissaat, pingaarutilinnik inerneqartoq akueraat. Issittumi Siunnersuisooqatigiinni Alaatsinaattut arfineq marlunnik ilaneqarput; International Council for the Exploration of the Sea (ICES), Oceana, National Geographic Society, OSPAR, Schweiz, Nunat Avannarliit Killiit Siunnersuisooqatigiiffiat Silasiortullu Nunarsuarmi Peqatigiiffiat (WMO). Qaninnerusumik suliffissuaqarnermut suliffeqarnermullu peqatigiiffinnut suleqateqarnissamut ammaassisoqarpoq. 

Ministerit ataatsimiinnerisa saniatigut Naalakkersuisoq Suka K. Frederikseni illuatungeriilluni ataatsimeeqateqarnermi naapippai, danskit nunanut allanut ministeriat peqatigalugu, Canadap nunanut allanut ministeria Chrystia Freeland USA-llu nunanut allanut ministeria Rex Tillerson, tassani sammisat assigiinngitsut eqqartorneqarlutik, ilaatigut killeqarfiit pillugit isumaqatigiinniartarneq, nunaviup toqqavia pillugu suliniut Pituffillu.

Naalakkersuisup ilaatigut erseqqissarpaa USA-p Kalaallit Nunaatalu akornanni sillimaniarnermik isumaqatigiissutaasunit aalajangersimasuni pingaaruteqarnerit ilagigaa USA-p Nunatsinni suliaqartarneri nunatsinnut innuttasunullu erseqqissunik iluaqutaanissaat.

”Ataatsimiinneq ingerlalluarpoq Rex Tillersonillu suliassaq pimoorullugu tiguvaa, taamatuttaarlu Nunatsinnut pulaarnissaanut qaaqquussutiga tigulluarlugu”, Naalakkersuisoq Suka K. Frederiksen oqarpoq.

Issittumi Siunnersuisooqatigiit ministerii ukiut marlukkaarlugit ataatsimiittarput, siulittaasuuffik tunniunneqartarpoq siulittaasuuffimmit inernerit saqqummiunneqaqqaarlutik. Ukioq manna ataatsimiinneq Fairbanksimi Alaskami ingerlanneqarpoq. Issittumi Siunnersuisooqatigiit USA-mit siulittaasuuffigineqarput 2015-imiit 2017-imut, siulittaasuuffillu Finlandimut tunniunneqarpoq piffissami 2017-imiit 2019-ip tungaanut.

Naalakkersuisoq Suka K. Frederiksen aamma USA-mi nunanut allanut ministeri Rex Tillerson.


Saaffigisassaq: Jacob Isbosethsen +299 556772