Nunani Avannarlerni qarasaasiaq atorlugu kinguaassiutitigut kanngutsaatsuliortarnerit ukkatarineqarput

Nunani Avannarlerni qarasaasiaq atorlugu kinguaassiutitigut kanngutsaatsuliortarnerit uumissuerpalaartumillu oqaaseqartarnerit akiorniarneqarnissaat kiisalu suliffeqarnermi naligiissitaanissaq ukkatarineqarput

Qarasaasiaq atorlugu kinguaassiutitigut kanngutsaatsuliortarnerit uumissuerpalaartumillu oqaaseqaateqartarnerit akiorniarneqarnerat kiisalu suliffeqarnermi naligiissitaanissaq pillugu nunani avannarlerni naligiissitaanermut naalakkersuisut maajip 9-ni ataatsimiinneranni Norge-p avannaani Hurtigruten Svolvær-p Tromsø-llu akornanni pisumi, oqallisigisaasa ilagaat.

"Uumissuerpalaartumik nittartakkatigut oqallittarfinni allanilu qaaseqartarnerit akiorneqartariaqarneri ataatsimoorfigaarput, misilittakkanillu aallerfigisinnaasatsinnik ataatsimiinnermi pissarsilluarpunga. Naligiissitaanermut tunngasuni arnat angutillu akornanni naligiissitaaneq taamaallaat pineqanngilaq, aamma inuit inuppaallu akornanni naligiimmik pinnittarneq, tassalu ataqqeqatigiinneq assigiinngisitaarnermillu inissaqartitsineq pineqarpoq" Isumaginninnermut, Ilaqutariinnut, Naligiissitaanermut Inatsisinillu Atuutitsinermut Naalakkersuisoq Sara Olsvig oqarpoq.

“Aamma persuttaasarneq nunani avannarlerni tamani unamminartuuvoq. Nunani avannarlerni naalakkersuisut naapinneri isumassarsititsipput qanoq ililluta Kalaallit Nunaanni nunat allat misilittagaat atorsinnaanerigut,” Sara Olsvig oqarpoq nangillunilu ”Ataatsimiinnermi ilaatigut suiaassutsimut atatillugu persuttaasarneq pillugu suliniutigisagut oqaluttuaraakka. Persuttaasartut katsorsarneqarnissaannik neqerooruterput Alliaq, november 2016-imi aallartitarput, Naalakkersuisullu persuttaasarneq akiorniarlugu periusissiaani iliuusissatullu pilersaarutaanni 2014 – 2017-imut ilaasoq soqutigineqartorujussuuvoq”.

Isumaginninnermut, Ilaqutariinnut, Naligiissitaanermut Inatsisinillu Atuutitsinermut Naalakkersuisoq Sara Olsvig-ip nunani avannarlerni naalakkersuisoqatiminut nuna tamakkerlugu piffinni assigiinngitsuni angutinut angutit oqaloqatigiittarfiinik (mandegrupper) pilersitsinissamik suliniuteqarneq maannakkut ingerlasoq saqqummiuppaa. Oqaloqatigiittarfiit siunertaraat angutit oqallittarfeqalernissaat, tassani angutit inuunerminni atukkatik unammilligassatillu eqqartorsinnaaniassammatigit, soorlu assersuutigalugu persuttaaneq, imminut toquttarneq, atornerluineq, ilinniagaqannginneq suliffeqarnelu.

”Nunat avannarliit allat naartusunut ernisunullu sulinngiffeqartitsisarneq pillugu assigiinngitsunik aaqqissuussisisarput. Suliffeqarnermi illuatungeriit suleqatigalugit erninermi sulinngiffeqarnissamut aningaasaateqarfimmik pilersitsisoqarnissaata sulissutigineqarnera Nunatsinni aallartippara, suliffeqarfeqarfinni naligiinnerulersitsisoqarnissaa qulakkeerniarlugu. Taamaammat soqutiginarsimavoq Kalaallit Nunaanni sulinermi naligiissitaanissap pilersinneqarnissanut suliniuteqarnitsinni nunat avannarliit ilanngussaat misilittagaallu tusaallugit”, Ilaqutariinnut, Naligiissitaanermut Inatsisinillu Atuutitsinermut Naalakkersuisoq Sara Olsvig naggasiivoq.

Nunani avannarlerni naligiissitaanissamik suliaqarneq ataatsimoorussamik, nunat avannarliit takorluugaannik, Nunanik Avannarlernik naligiissunik periafissaqartunillu, innutaasut tamarmik pisinnaatitaaffeqarnerannik pisussaaffeqarnerannillu, apeqqutaatinnagu niviarsiaraagunik, nukappiaraagunik, arnaagunik angutaagunilluunnit, tunngaveqarpoq.
Norge, ukioq manna Nunani Avannarlerni Ministerit Siunnersuisoqatigiiffianni siulittaasoqarfimmik tigumminnittuuvoq, taamaammallu ukioq manna ataatsimiinnermut qaaqqusisuuvoq. Nunanut avannarlernut naleqquttunik naligiissitaanermut sammisaq pillugu siulittaasoqarfittut annertuunik pilersaaruteqarpoq, suliniutinik assigiinngitsunik isumasioqatigiinnernik imaqartumik. Nunani Avannarlerni Ministerit Siunnersuisoqatigiiffiat nalunaarusianik aammalu atukkanik misissuinernik ilaatigut persuttaasarneq, uumissuerpalaartumillu oqaaseqaateqartarneq suliffeqarnermilu naligiissitaaneq pillugit saqqummiussisarpoq.


Paaisussutissanik sukumiinerusunik naalakkersuisumut allatsimut Nina Jul Larsen-mut piniartoqarsinnaavoq, oqarasuaat 539371.