Imigassamut inatsit naatsumik eqikkarlugu

Naqqitaq 18. maj 2017

Ulluni makkunani imigassamut inatsit nutaaq tusagassiuutini oqallisigineqarpoq. Oqallinnermi ajoraluartumik paatsoortoqarsimavoq, taamaattumik inatsisip siunertaata imaatalu naatsumik sammineqarnissaat pisariaqartinneqarpoq.

Meeqqat inuusuttullu siusissukkut imigassamik usseeqqaarnissaasa atornerluisunngornissaasalu pinngitsoortinnissaa inatsimmi pingaarnertut anguniagarineqarpoq. Ukiorpassuarni politikkikkut nunatsinni inooqatigiinnikkut peqqissutsikkullu ajornartorsiuterujussuit pitsaaliorniarlugit suliniartoqarsimavoq. Ajornartorsiuterpassuit taakku imigassamik atornerluinermut attuumassuteqarput, aamma suliat nakuusernermut, sumiginnaanermut kinguaassiuutitigullu atornerluinermut tunngasut aalakoornerup nalaani iliuuserineqartarput.

Imigassamut inatsit iluaqutigalugu Naalakkersuisut kissaatigaat pitsaaliuilluni suliat tapersernissaat innuttaasullu, pingaartumik meeqqat, pitsaasumik inuuneqalernissaannut sinaakkusiinissaq. Imigassamik atuinerup sapinngisamik killilersornissaa aamma meeqqat inuusuttullu angerlarsimaffimmi imigassamik atornerluiffiusumi peroriartornissaasa imaluunniit sumiiffinni tamanut ammasuni aalakoortunik takusaqarnissaasa pitsaaliornissaat imigassamut inatsimmi anguniagaavoq.

Siunnersuut Nunarsuaq tamakkerlugu Peqqinnissamik Suliniaqatigiiffiup WHO-p imigassamut tunngatillugu sunniuteqarluartumik pitsaaliuinissaq - pingaartumik imigassap takussaanerata, pissarsiarineqariaannaanerata nittarsaanneqarneratalu killilersornissaa - pillugu kaammattuutaanik tunngaveqarpoq.

                                            

Imigassamik atuineq qaffakkiartorpoq

Inuppassuit isumaqarput imigassamik atuineq appariartortoq, taamatullu kukkusumik isumaqarneq oqallinnermut sunniuteqarpoq. Ajoraluartumik imigassamik atuineq qaffakkiartorpoq, tamannalu inatsisip nutaap eqqartornerani eqqumaffigissavarput. Nunatsinni Naatsorsueqqissaartarfik naapertorlugu 2015-imiit 2016-imut imigassamik eqqussuineq 5,4 procentimik annertuseriarsimavoq. Literinngorlugu 2016-imi inuit 14-it sinnerlugit ukiullit 8,3 literimiit 8,7 literimut imigassamik allamik akoqanngitsumik imersimapput.

Inatsisissatut siunnersuutip imaa naatsumik eqikkarlugu:

  • Nittarsaassinermut assiaqusersuinermullu tunngatillugu takussaassusermut malittarisassat sukaterneqarput. Tamatuma kingunerisaanik nittarsaassinerit suulluunniit inerteqqutaalerput, imigassallu aalakoornartortallit pisiniarfinni assiaquserneqartassapput.  Imigassanik aalakoornartortalinnik pisiniarfimmi nioqqutissanit allanit assiaqusersuineq ingerlanneqassaaq inimik immikkoortumik pilersitsinikkut.

  • Imigassat aalajangersimasumik akeqartillugit tuniniarneqassapput, imigassat akikillisanngorlugit tuniniaqqusaajunnaassapput.
  • Imigassanik tuniniaasarnermut ammasarfiit siunnersuummi tunngaviusumik allanngortinneqanngillat. Taamaallaat arfininngornikkut imigassamik tuniniaasarneq allanngorpoq, tamatumani ammasarfiit nal. 9.00-13.00-imiit nal. 11.00-14.00-imut nikisinneqarmata.
  • Sassaalliuteqartarnermut piffissat allanngortinneqanngillat. Taamaallaat juullimi allanngortitsisoqarpoq, tamatumani sassaalliuteqartarneq matuneqassaaq.
  • Kommunini tamani akuersissuteqartarnermut aalajangiisarnermut pilersinneqassapput, tamatumani politikerit, suliffeqarfinnit atorfilittat, politiit, isumaginnittoqarfik pitsaaliuinermilu sulisut ilaasortaatitaqartassapput. Sulisut ulluinnarni suliaminni imigassaq pillugu kommunimilu imigassamut tunngatillugu ajornartorsiutinik ilisimasaqarluartuunertik ilisarnaatigissavaat. Akuersissuteqartarnermut aalajangiisartut imigassamik nioqquteqarsinnaanermut sassaalliuteqarsinnaanermullu akuersissutit assigiinngitsut tunniussinnaavaat aamma imigassap sakkortussusaa apeqqutaatillugu tuniniaasinnaanermut sassaalliuteqarsinnaanermullu akuersissutit tunniussinnaallugit.
  • Imigassat aalakoornartortallit pineqartillugit killiliussaq 2,25 volumenprocent-imit 0,5 volumenprocent-imut allanngortinneqarpoq.
  • Nerisassat annissassat pillugit aalajangersakkamik nutaamik ilanngussisoqarpoq, tamatumani nerisassanik annissassanik pisinermi imigassanik aalakoornartortalinnik pisisoqarsinnaajunnaassaaq.
  • Piumasaqaataalissaaq pisortat namminersortullu paaqqinnittarfiit tamarmik imigassamik atuinermut politikkiliussasut.
  • Neriniartarfinni sassaalliuteqartarfinnilu sulisut imigassanik aalakoornartortalinnik akisussaassuseqartumik tuniniaaneq sassaalliuteqartarnerlu pillugit pikkorissartinneqartarnissaat aallartisarneqassaaq. Pikkorissarnerit Naalakkersuisunit neqeroorutigineqassapput.

Naalakkersuisut imigassamut inatsisissatut siunnersuut Inatsisartut ukiakkut ataatsimiinneranni saqqummiutissavaat. Siunnersuut tusarniutigineqarpoq tamarmilu tusarniaanermut nittartakkami uani atuarneqarsinnaalluni: www.naalakkersuisut.gl

Paasisaqarnerorusukkuit Naalakkersuisup allattaa Nauja Møller mobilikkut: +299 58 26 54-ikkut imaluunniit e-mailikkut: nmoe@nanoq.gl attavigiuk.