Olsvigip aningaasarsiat naligiinnginnerat danskit justitsministeriannut qaqippaa

Naalakkersuisoq Sara Olsvig Justitsminister Søren Pape Poulsen ullumi ataatsimeeqatigaa. ”Ataatsimiinnermut tunuliaqutaavoq kissaatiginarmat Inatsisinut Atuutsitsineq pillugu tusarniaaneq marsimi pisoq sukkanerusumik malitseqartinnissaa” Sara Olsvig oqaaseqarpoq.

Sara Olsvig nangippoq ”Naalakkersuisut Inatsisinut Atuutsineq annertuumik ukkataraat kissaatigaallu suliassaqarfiup taassuma nukittorsarnissaa ineriartortinnissaalu”.

Ullumi ataatsimiinnermi makku sammineqarput:

  • Kalaallit Nunaanni Inatsisinut Atuutsitsinermi suliassaqarfiup ataani sulisut aningaasarsiaat
  • Kommunifogedinut atugassarititaasut sulinermilu atukkat
  • Isertitsivimmiittunut katsorsaaneq, matumani pineqarlutik peqqinnissaq tunngavigalugu sullinneqarneq, atornerluinermit katsorsartinneq kanngutsaatsuliorsimasunullu katsorsaaneq
  • Suliassat suliarineqarnissamut utaqqisut ikilisarniarnerini killiffik
"Qulequttat pillugit eqqartuilluarpugut, maluginiarparalu danskit tungaanniit Kalaallit Nunaanni Inatsisinut Atuutsitsinermut suliassaqarfik nukittorsarnissaa kissaatigineqartoq. Ilanngullugu nuannaarutigaara Inatsisinut Atuutsitsinermut suliassaqarfik pillugu periusissiamut suliassaq aallartissimasara danskit justitsministeriannit tigulluarneqarmat” Sara Olsvig naggasiivoq.

Paasisaqarnerorusuttut attavigisinnaavaat naalakkersuisumut allatsi Nina Jul Larsen oqarasuaat +299 53 93 71.