Nunarput oqimaaqatigiiffiunerusoq

Naalakkersuisut kissaatigaat nunatsinni aamma Nuup avataani inuusoqarlunilu, najugaqartoqarlunilu suliffeqartoqarsinnaassasoq. Nunami tamarmi ineriartortitsillutalu periarfissanik pilersitserusuppugut. Taamaattumik pisortani suliffeqarfiit ilai Nuummiinnatik nunatsinni illoqarfinni allaniinnissaat pillugu isuma tapersersorparput.

Naalakkersuisut aalajangerpaat ilinniakkat/ ilinniarfeqarfiit aalajangersimasut arlallit Nuummiit illoqarfinnut allanut nuunneqarnissaat anguniassallugu. Ilinniarfiit makku pineqarput:

  • Saviminilerinermik Ilinniarfik Sisimiunut
  • Niuernermik Ilinniarfik (NINUUK) Qaqortumut
  • Isumaginninnermut siunnersortitut ilinniagaq Ilulissanut
  • Eqqumiitsuliornermik Ilinniarfik Aasiannut

Aalajangernermut tunngavissap tunngavilersorluarneqarnissaa qulakkeerniarlugu inaarutaasumik aalajangiinnginnerminni Naalakkersuisut aalajangerpaat ilinniarfeqarfinnik taakkunannga sisamanik nuussinerup kinguneqaatissai sukumiisumik ersersinneqassasut. Misissueqqissaarnermi pissutsit makku ilaatigut ilanngunneqassapput:

  • Nuussinermi aningaasartuutit, sanaartornissamut pisariaqartitsineq aamma ingerlatsinermi aningaasaqarneq
  • Ilinniartussarsiornermut kiisalu ilinniartut ineqarfiinik pisariaqartitsinermut sunniutissat
  • Sulianut tunngatillugu avatangiisit ilinniartitsisunillu atorfinitsitsiniarneq
Misissueqqissaarnerit septembarimi naammassineqassasut naatsorsuutigineqarpoq. Taamaasilluni 2018-imut aningaasanut inatsisissatut siunnersuutip suliarineqarnerani, 2018-imut aningaasanut inatsimmi nussuinissamut pilersaarummi aningaasaliinissamut pisariaqartitsinerup ilanngunneqarnissaanut siunnersuummik saqqummiussinissaq Naalakkersuisut anguniarpaat.

Naalakkersuisut upperaat, siammarterineq inuiaqatigiinni oqimaaqatigiinnermik pitsanngorsaanermut pingaaruteqartuusoq.

Inussiarnersumik inuulluaqqusilluta

Aqqaluaq B. Egede, Aningaasaqarnermut Akileraartarnermullu Naalakkersuisoq
Doris Jakobsen, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq.