Upernaviup nunaqarfiisa ilaanni Naajaani qimmit nappaataannik pasitsaassaqarneq

Uumasunut Nakorsaqarfiup Inuussutissalerinermullu Oqartussaqarfiup (UNIO) maajip arfineq pingajuanni 2017 nalunaaqutaq 12.58, nunaqarfimmi Naajaani qimmit qimuttut arlaqartut nappaammik tuniluuttumik takussutissaqartut pillugit paasissutissanik tigusaqarpoq aamma qimmit arfineq marluk toqusimasut.

Paasissutissiineq tunuliaqutaralugu UNIO naliliivoq nappaammik siammaasinnaaneq aarlerinarsisoq pisorlu pillugu qanimut malinnaasoqartoq. Erniinnartumik ilimanaateqanngilaq nappaatip inunnut tuniluussinnaanissaa.

Innuttaasunit paasissutissat oqartussaasullu attuumassuteqartut suleqatiginerisigut UNIO paasissutissanik sapinngisamik amerlanerpaamik pissarsiniarluni suliniuteqarpoq, pisoq pillugu ersarissumik tunngavissiiumallutik.

Nunap ilaani pineqartumi qimmit pillugit nappaateqarnermik imaluunniit toqusimanermik paasissutissanik piaartumik paasisaqarusupput taamaasiornermikkut pisoq pillugu ingerlaavartumik malinnaajumallutik. Pingaaruteqarpoq qimmit nappaalasut pillugit ersiutinik paasititsinissaq aamma toqusimasut pillugit ersiutaasimasinnaasunik paasissutissanik tunniussinissaq.

UNIO saaffigineqarsinnaavoq email uumasut@nanoq.gl imaluunniit oqarasuaat +299 345000

Naajaani innuttaasunut Naajaallu nunataata eqqarisaaniittunut UNIO-miit uku kajumissaarutigineqassapput:

Qimmilivimmi:
  • Qimmit tamarmik pitunneqassapput ungalusamulluunniit mattunneqarlutik.
  • Nunaqarfimmi nunataatalu eqqarisaani qimminik angalaannartunik ungoorinerit imaluunniit toqutsinerit.
  • Qimmit arnavissat piaqqallu qimmilivimmut ungalusamut immikkoortinneqassapput.
  • Qimmiisivimmit qimmit qaqugukkulluunniit nuunneqassanngillat.
  • Uumasut tassanngaannartumik nappaalanermik takussutissaqalertut toqunneqassapput.
  • Qimmiisivinniit qimmit anaat piiarneqassapput.
  • Qimmiutillit taamaallaat nammineq qimmiutiminnik passussisariaqarput.
  • Inuit immikkut susassaqartitat kisimiillutik qimmiisivimmiissinnaatitaapput.
Qimussimik Naajaaniit Naajaanut angallanneq
  • Pisoq pillugu isumannaarisoqarnissaata tungaanut nunamut immikkoortumut tassunga tassanngalu qimussinik qamuteralannillu motoorilikkanik angallanneq sunaluunniit pinngitsoortinneqassaaq.
  • Uumasut nappaalasut toqusimasullu passunneqarneri
  • Uumasut nappaalasut toqusimasullu passunneqarnerini aaqqatinik ataasiartakkanik kamippaallu qalliutaannik illersuuteqarnikkut atuilluni pissaaq.
  • Uumasut toqusimasut puussiamut plastikkiusumut iginneqassapput ikuallakkiartornissaannullu assartorlugit imaluunniit qimmeqarfinniit qimagunnikkut illikarluni ikuallaaviusumut.
  • Qimmeq nappaalanersoq takuneqarsinnaava?
  • Qimmeq piffissami aalajangersimasumi (sapaatip akunneri arlaliusinnaasuni) nappaammik tunillatsissimasinnaavoq ersiutinik takussutissaqanngikkaluarluni.
  • Taamaammat nunap immikkoortuani pineqartumi nappaalanerup tunillaassuussinnaanerata nalaani qimmit imminnut atassuteqartinneqassanngillat.
Kapuineq pillugu
  • Piffissami matumani nunami immikkoortumi eqqugaaffiusumi qimminik kapuisoqassanngilaq!
  • UNIO pisumi qulaajaalluni tamani misissuereerpat nunami immikkoortumi pineqartumi kapuisoqassanersoq aatsaat naliliissuteqarsinnaavoq.
  • UNIO-p ersarilluinnartumik nalunaarutigissavaa qimmini nappaalasuni tuniluussinnaasunik virusimik nappaalasoqartillugu, soorlu qimmit nappaataattut ittut aamma parvovirusitut ittut, taamaallaat kapuinikkut pinaveersaartinneqarsinnaammata.
  • Qimmit nappaalalereersut kapuinikkut imaluunniit antibiotikamik nakorsarneqarnikkut qimmit nappaalasut tuniluussinnaasunik virusimik napparsimalereersut ajorunnaarsinneqarsinnaanngillat.