Nuna tamakkerlugu inunnut innarluutilinnut sullissivissap atissaanik unammisitsineq

Naalakkersuisut innarluutilinnut sullissivissaq 2017-mi ukiakkut ammassavaat.

Sullissivik atserneqassaaq, kikkullu tamarmik siunnersuuteqarnissaminnut peqataasinnaapput.

Naalakkersuisoq Sara Olsvig ima oqaaseqarpoq:  ”Inunnut innarluutilinnut sullissivissaq nuna tamakkerlugu sullissiviussaaq, sullissivillu inunnut innarluuteqartunut inuiaqatigiinnullu sullissisussaammat, Naalakkersuisut nunatsinni innuttaasut peqatiseraat sullissivissap nunatsinnut pingaaruteqartup atserneqarnissaanut”.

Sullissivissap siunertaraa, innuttaasut innarluuteqartut inuunerinnerulernissaat kiisalu inuunerminni atukkatigut nalinginnaanerusumik inuiaqatigiinni akuusinnaanissaat, tamatumani namminerisaminnik angerlarsimaffeqaannarsinnaanissaannut, inuiaqatigiinni akuunerunissaat suliffeqarfinnullu atassuteqarnermikkut periarfissaginnerulernissaat sulissutigissallugu.

Sullissiviup neqeroorutigissavai siunnersuineq, ilitsersuineq aammalu inunnut innarluuteqartunut sungiusaaneq – meeqqanut inersimasunullu – kiisalu qanigisaasunut inunnullu innarluutilinnut sullissisunut siunnersuillutillu ilitsersuissapput.

Siunnersuutit uunga mail-imut nassiunneqassapput: ipis@nanoq.gl  imaluunniit uunga nassiullugit: Isumaginninnermut, Ilaqutariinnermut, Naligiissitaanermut Inatsisinullu Atuutsitsinermut Naalakkersuisoqarfik, Postboks 260, 3900 Nuuk

Siunnersuutit kingusinnerpaamik 16. maj tigoreersimassuagut