Aalisarnerup iluani ilinniarnerit pitsaanerunissaat isumassarsiatsialaavoq

Sermitsiap nittartagaatigut KNR-illu radiukkut nutaarsiassaatigut nutaarsiassiissutigineqarpoq Halibut Greenlandip aalisarnerup iluani ilinniarnissamut periarfissat amerlanerusut kissaatigigai. Nutaarsiassaq takkuppoq Halibut Greenlandip tusagassiorfinnut nalunaarutaa malisungaannarlugu tassani ilaatigut oqaatigineqarmat suliffeqarfiup Qaasuitsup Kommunia peqatigalugu aalisakkanik tunisassiorfimmi suliat qitiusut pillugit tunisassiornermik suliaqartunut pikkorissartitsinissaq kissaatigigaat.

Aammattaaq Halibut Greenlandip kissaatigaa nunatsinni tamakkiisumik aalisakkerinermik atuilernissaq qulakkeerniarlugu  ilinniarfimmik pilersitsisoqartariaqartoq.

Naalakkersuisooqatigiinnissamut isumaqatigiissummi allassimavoq: “Aalisakkanik sapinngisamik annertunerpaamik nunatsinni nalituunngortinneqarlutillu annerpaamik tunisassiarineqartassapput”, tamanna tunngavigalugu

Ilinniartitaanermut Naalakkersuisoq, Doris Jakobsen isumaqarpoq Aalisakkerinermut ilinniarfissamik pilersitsinissaq timitaliinissamut tunngaviliissasoq kiisalu nutaanik eqqarsarnissamut,  aallartisaasinnaanermut pitsaasunik periarfissiissasoq. Aamma suliniutigineqassasoq aningaasat kaaviiaartitat amerlisarnissaat inuussutissarsiorfinnilu tamani patajaatsumik aningaasaqarnikkut ingerlalernissaq anguneqarsinnaasoq.

“Naalakkersuisut Halibut Greenlandip aalisarnermut tunngasunik ilinniagaqarsinnaanermut kissaataa nuannaarutigeqaat suliniut naalakkersuisooqatigiinnissamik isumaqatigiissummut naapertuulluarmat piviusunngortittariaqartoq. Aalisakkerinerup iluani ilinniarnerit assigiinngitsunik qaffasissusillit ukkatarineqartariaqarmata Naalakkersuisut suliniut pitsaasutut isigaat. Nunatsinnimi ilinniartitaanerit upalungaarsimaffigisariaqarpaat inuusuttut suliffinnut nunatta sulisunik pisariaqartitsiffigisaanut ilinniagaqartissallugit”, Ilinniartitaanermut Naalakkersuisoq, Doris Jakobsen aamma Aalisarnermut Piniarnermullu Naalakkersuisoq, Karl-Kristian Kruse isumaqatigiilluinnarlutik unnerput.

“Inuusuttortavut soqutigisaminnut naapertuuttumik ilinniagaqarsinnaaqqullugit ilinniartitaanikkut aaqqissuussinermik eqaatsumik ataqatigiissumillu pilersitsissaagut. Inuussutissarsiornermik suliaqartut pisariaqartitaat naapiffigiumallugit aamma ilinniartitaanerit kattussorlugit inerisarlugillu ingerlaavartumik sulisoqarpoq”, Doris Jakobsen oqarpoq.

Aalisarnermut Piniarnermullu Naalakkersuisup qularutiginngilaa aalisakkanik  nalitusaalluni tunisassiorneq annertusarneqassasoq suliffeqarfiup kissaataa piviusunngortinneqarpat. “Immikkut ukkatarerusutatta ilagaat aalisakkanik tamakkiisumik atorluaanissaq  taamaalilluta nunatsinni isumalluutivut atorluarsinnaanerulissagatsigit” Karl Kristian Kruse oqarpoq.

Inuussutissalerinermik ilinniarfimmi INUILI-mi Procesteknikkeritut ilinniartoqarsinnaareerpoq aalisarnermi teknologi immikkut itisileriffigalugu naammassineqarsinnaasumik. Ilinniarnerup taassuma ilinniartut aalisakkerivinni tunisassiornermi pilersaarusiornermik, inuussutissanik igariaannarnillu tunisassiornermi nakkutilliinermik  piginnaasaqalersittarpai. Ilinniartitaanermut Naalakkersuisoqarfiuttaaq ilinniakkanik aalisakkerinermut sammisunik annertusaaniarluni sulineq, ilaatigut INUILI suleqatigalugu aallartereerpaa.

Sammisaq naalakkersuisooqatigiinnissamik isumaqatigiissummut ilaareermat Naalakkersuisut Halibut Greenland tunisassiortullu soqutiginnittut allat oqaloqatigiumallugit naapikkusuppaat. Naalakkersuisut neriupput inuussutissalerinermi ilinniarnissamut periarfissat pillugit suliffeqarfiit ilisimasaminnik avitseqateqarnissaminnut soqutiginnikkumaartut.  

Paasisaqarnerorusukkuit attavigikkit:

Paasissutissiisartoq Ludvig Siegstad, lusi@nanoq.gl +299 345000, Aalisarnermut Piniarnermullu Naalakkersuisoqarfik, imaluunniit: 

Naalakkersuisup allattaa Rosa Thorsen, rosat@nanoq.gl +299 553303, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik