Suleqatigiinnermut ministerit Tórshavnimi naapinnerat

Nunani avannarlerni suleqatigiinnermi oqartariaatsit nunanut qanitanut suleqatigiinnermut, tamat oqartussaaqataanerannut ataqqinninnermut, nunat inatsisaannut inuillu piginnaatitaanerannut, nunani avannarlerni piorsarsimassutsinut ataqqinninnernut kiisalu suleriaatsinut tamanut assigiissumik atugassaqartitsisumut aallaavigalugit Savalimmiuni, Kalaallit Nunaanni Ålandimilu suleqatigiinnermut ministerit nunani avannarlerni suleqatigiinnermi inissisimaffitik 3. Maj 2017-imi eqqartorpaat, matumani nunat unamminartortaat nunallu naalakkersuinikkut siunissamut qanoq anguniagaqarnertik takorluugaqarnertillu aamma eqqartorlugit.

Ministerit paasivaat nunani taakkunani namminersorlutik oqartussaqarnermik ingerlatsiviusuni – Savalimmiut, Kalaallit Nunaat aamma Åland – Nunani Avannarlerni innuttaasut amerlassusaat naalakkersuinikkullu sunniuteqartarnerat annikitsuusoq suliassaqarfinnili allarpassuarni akerlianik pingaaruteqartumik inissisimallutik. Nunat imartaallu namminneq isorartoqaat pisuussuterpassuaqarlutik nunanilu tamalaanut tunngasuni pingaaruteqartorujussuullutik.

Nunani avannarlerni suleqatigiinnermut ministerit oqaloqatigiittarfianni Savalimmiut, Kalaallit Nunaat Ålandillu akornanni Nunat Avannarliit Siunnersuisoqatigiiffiata ataatsimiittarneranni suleqatigiilluartoqartoq ministerit isumaqatigaat sulissutiginiarlugulu nunani taakkunani pingasuni naalakkersuisunut ilaasortaasunut tamanut sulissutigineqassasoq nunani avannarlernut tunngasuni suleqatigiinnermi inissisimaffiup patajaallisarnissaa angutserlugu.

Nunat assigiinngitsuuneri ministerit nassuerutigaat, nunanilu avannarlerni suleqatigiinnernut tunngasunik atuuffitsik pillugu assigiinngitsunik anguniagaqarlutillu takorluugaqarlutik.

Nunat avannarliit suleqatigiinnerisa ineriartorteqqinnerannut atatillugu maanna suleqatigiinnerup suliassaqarfinnut allanut nutaanut allilernissaanut periarfissanik misissuissallutik kiisalu pisariaqartitsineq naapertorlugu ataqatigiissaariniarlutik naapittarnissaminnut ministerit piareeqqapput uani anguniakkatut taaneqartut malinneqarnissaat tassuunakkut qulakkeerniarlugu.

Tamanna tunuliaqutaralugu nunani avannarlerni sulinermi imminnut sapinngisamik annerpaamik ikorfartoqatigiinnissartik ministerit kissaatigaat, matumani Savalimmiut tamakkiisumik ilaasortanngornissaannik kissaataat ilanngullugu eqqarsaatigalugu.

Poul Michelsen           
Samarbejdsminister
Færøerne

Agathe Fontain         
Samarbejdsminister
Grønland
Nina Fellmann
Samarbejdsminister
Åland