Tunup avannaani misileraalluni aalisarnissaq

Naalakkersuisut maajip aappaanni aalajangerput Tunup avannaani 67N-ip avannaani 2017-imi misileraalluni aalisartoqarsinnaassasoq.
Misileraalluni aalisarneq ima nassuiarneqarpoq, ukulu siunertarineqarlutik:

  • aalisagaqatigiinnik ilisimasaqarfigineqanngitsunik ilisimatusarnikkut misissuineq
  • sumiiffinnik ilisimasaqarfigineqanngitsunik misissuineq
  • aalisariaatsit atortullu nutaat atorlugit aalisarnermik misissuineq
Aalisakkat Tunup avannaani, 67N-ip avannaani misileraalluni aalisarnermi pineqartut tassaapput qalerallit, saarulliit, nataarnat aamma allat.

Piumasaqaatit
Pisassiissutit 1.000 tonsiupput, taakkunannga taamaallaat 400 tonsit qaleraliullutik.

Misileraalluni pisassiissutinik ningittagarsorluni, kilisalluni, qassusersorluni, pullasersorluni qassutinillu aalajangerneqarsimasunik aalisartoqarsinnaavoq. Aalisarneq ingerlanneqassaaq tunngaviusumik killeqarfimmiit avammut EEZ-mut. Itissutsini 200 meterinik itinerusuni qassutit atorneqaqqusaanngillat.

Ingerlatseqatigiiffiit qinnuteqartut aalisarnermut pilersaarummik Naalakkersuisoqarfimmut nassiussissapput. Aalisarnermut pilersaarutikkut nassuiarneqassaaq, qanoq iliorluni ingerlatseqatigiiffiup sumiiffimmi misileraalluni aalisarnermik siaruartitserusunnera. Qinnuteqartunit sulianik suliarinninnermi aalisarnermut pilersaarut pingaartinneqassaaq.

Attavigineqassaaq: Aalisarnermut Piniarnermullu Naalakkersuisoqarfimmi immikkoortortami pisortaagallartoq, Kunuk Holm. Email: kuhn@nanoq.gl