Imigassaq Ikiaroornartullu pillugit Siunnersuisoqatigiit siunnersuutaat misissueqqissaarnermik tunngaveqarpoq

Imigassaq Ikiaroornartullu pillugit Siunnersuisoqatigiit imigassaq pillugu misissuineq tunuliaqutaralugu Demokraatit imigassanik aalakoornartortalinnik tuniniaasarnerup ammasarfiisa sivitsorneqarnissaat pillugu siunnersuutaasa piviusunngortinneqarnissaa pillugu mianersoqqusipput. Tamanna pissutigalugu Randi Vestergaard Evaldsenip aamma Justus Hansenip siunnersuisoqatigiit politikkimik tunngaveqarnerarlugit uparuarpaat. Peqqissutsimut Naalakkersuisup, Agathe Fontainip, isornartorsiuineq akivaa.

- ”Isumaqarpunga isornartorsiuineq peqqarniitsuullunilu tunngavissaqanngitsoq. Imigassaq Ikiaroornartullu pillugit Siunnersuisoqatigiit politikkimut kalluunnaveersaartuupput, kisianni suliamut tunngatillugu kalluunnaveersaarsinnaanatillu kalluunnaveersaanngisaannassapput. Siunnersuisoqatigiit pilersinneqarput imigassaq ikiaroornartullu pillugit isummersoqqullugit aamma imigassamut ikiaroornartumullu tunngatillugu pitsaaliuinermi siunnersuutini Naalakkersuisunut ingerlateqqittaqqullugit.

Imigassaq Ikiaroornartullu pillugit Siunnersuisoqatigiit suliaq pillugu siunnersuisartuupput. Tassa siunnersuisoqatigiit siunnersuutaat imigassaq ikiaroornartullu pillugit misissuinermi paasisat kingulliit tunngavigalugit siunnersuisarput. Taamaattumik imigassanik aalakoornartortalinnik tuniniaasarnerup sivitsorneqarnissaanik siunnersuutaat siunnersuisoqatigiinnit mianersoqqussutigineqarnera pissutigalugu Randi Vestergaard Evaldsen aamma Justus Hansen Imigassaq Ikiaroornartullu pillugit Siunnersuisoqatigiit Naalakkersuisut soqutigisaannik aallussinerarlugit uparuaagamik killissartik qaangerpaat.

Pineqartoq pillugu ilisimatuut misissueqqissaarnerat tunngavigalugu siunnersuisoqatigiit Naalakkersuisunut siunnersuisarput. Misissueqqissaarnerillu tunngavigerpiarlugit Demokraatit ammasarfiit sivitsorneqarnissaannik siunnersuutaat siunnersuisoqatigiit mianersoqqussutigigaat. Tassami misissueqqissaarnermit ersersinneqarpoq imigassamik atuinerup annikillisinnissaata imigassamillu atornerluinerup pitsaaliornissaata anguniarneranni ammasarfinnut tunngatillugu killilersuineq sunniuteqarluartartoq,” taama Peqqissutsimut Naalakkersuisoq, Agathe Fontain, oqarpoq.

Paasisaqarnerorusukkuit Naalakkersuisup allattaa Nauja Møller mobilikkut: +299 58 26 54-ikkut imaluunniit e-mailikkut: nmoe@nanoq.gl attavigiuk.