Ujaqqanik pinnersaasiassat qiperukkallu pillugit tusarniaaneq

Ujaqqanik pinnersaasiassanik aamma ujaqqanik qiperukkanik Kalaallit Nunaanneersunik uppernarsaammik allagartaliisarneq pillugu nassuiaatip tamanut ammasumik tusarniaassutigineqarnera

Aatsitassanut Ikummatissanullu Naalakkersuisoqarfik ujaqqanit tunisassianut, ilanngullugit ujaqqat pinnersaasiassat aamma ukkusissat, nunatsinneersunut uppernarsaammik allagartaliisarnermut aaqqissuussamik atuutsitsilersinnaanissaq pillugu nassuiaammik suliaqarpoq.

Naalakkersuisut qinnuigineqarnissaat pillugu Inatsisartuni aalajangiineq tunngavigalugu nassuiaammik suliaqarneq Aatsitassanut Ikummatissanullu Naalakkersuisoqarfimmit aallartinneqarpoq. Maannakkullu nassuiaat ammasumik tusarniaassutigalugu nassiunneqarpoq. Nassuiaat Naalakkersuisut tusarniaanermut nittartagaanni pissarsiarineqarsinnaavoq, aammalu kikkut tamarmik tusarniaanermut akissuteqaammik tunniussisinnaallutik.

Nassuiaammi allagartalersuinermi uppernarsaaseeriaatsit assigiinngitsut iluaqutissartaat anigorniagassartaallu nassuiarneqarput, nunatsinnilu allagartaliisarnermut aaqqissuussisoqarnissaanik inassuteqaateqartoqarluni. Uppernarsaatinik allagartalersuisarnermi innuttaasut, inuussutissarsiortut, pisortat sullissiviini nunatsinni nunanilu allani misilittagarineqartut nassuiaammittaaq ilanngunneqarput.

Ujaqqanit tunisassianut Kalaallit Nunaanneersunut uppernarsaammik allagartaliisarnermut aaqqissuussamut siunertaasoq tassaavoq, ujaqqat tunisassiassat Kalaallit Nunaanneersut nittarsaanneqarnissaannut ataatsimoorfissaqalersitsinissaq. Tamatuma saniatigut aaqqissuussami siunertaavoq, ujaqqap tunisassiap assaammik sanaajunera, kiisalu ujaqqat Kalaallit Nunaanni piiarneqarsimanerat suliarineqarsimanerallu, ujaqqanit tunisassianik pisisunut uppernarsarlugu allagartaliisarnissaq. Tunisassiap uppernarsaammik allagartalerneqarnerani, peqatigisaanik ujaqqap niuerutigineqarnerani ileqqorluttumik aningaasalersuisoqanngitsoq uppernarsarlugu allagartalerneqassaaq, tamannami ujaqqanik pinnersaasiassanik pingaartumik diamantinik pisinermut atatillugu aarlerissutigineqarsinnaammat. Taamaaliornikkut atuisumut paasiuminartuutitsinissaq toqqissisimatitsinissarlu qulakkeerneqassaaq, allagartalersuinerlu atorlugu nunatsinni ujaqqanik niuernerup kajuminnarnerulernissaa aammalu ujaqqanit tunisassianut akigititat qaffasinnerulersinneqarsinnaanerat aqqutissiuunneqassalluni.

 

“Naalakkersuisut nunaqavissut atugassarisaasa pitsaanerulersinneqarnissaaannut sinaakkutinik pitsanngorsaallutik sulipput. Ujaqqanik pinnersaasiassanut nunatsinneersunik uppernarsaammik allagartalersuinermut aaqqissuussineq ujaqqerituuniit inuussutissarsiortunut atugassarititaasut pitsaanerulernissaannik qulakkeerinneqataassaaq,” tusarniaaneq pillugu Aatsitassanut Ikummatissanullu Naalakkersuisoq Múte B. Egede taama oqaaseqarpoq.

Nassuiaat nittartakkami uani nassaarineqarsinnaavoq: naalakkersuisut.gl, ingerlaqqinnermi  Tusarniaanerit  tooraanni Tusarniaanerit ingerlasut-nut iserfigalugu. Ujaqqanik pinnersaasiassanik aamma ujaqqanik qiperukkanik Kalaallit Nunaanneersunik uppernarsaammik allagartaliisarneq pillugu nassuiaammut siunnersuummut oqaaseqaatissaqaraanni e-mailimut uunga mmr@nanoq.gl-imut kingusinnerpaamik ulloq 31. maj 2017 nassiunneqasssaaq.

 

Attavissat:

Departementschef, Jørgen T. Hammenken-Holm, joeg@nanoq.gl , tlf. 34 68 46

Ministsersekretær, Jane P. Lantz, japl@nanoq.gl, tlf. 34 68 39/59 79 09