Danmarkimi ilinniartut angerlarusupput

Namminiilivinnermut, Nunanut Allanut Nunalerinermullu Naalakkersuisup Avalaallu ataatsimeeqatigiinnerminni Danmarkimi ilinniartut namminersulivinnissamut isumaat ilinniarnerminnilu atugarisaat eqqartorpaat.

Namminiilivinnermut, Nunanut Allanut Nunalerinermullu Naalakkersuisoq, Suka K. Frederiksen, Avalammi sinniisuutitat angalanerat iluatsillugu apriilip 27-anni ataatsimeeqatigai.

”Politikkimi sulinermi pingaaruteqarpoq namminiilivinnissamut ingerlaarnitsinni Danmarkimi ilinniagaqartut qanimut peqataatinnissaat. Pingaaruteqarpoq ilinniagaqartut namminiilivinneq pillugu pituttorsimanngitsumik oqallittarnermikkut inerniliussanik apuussisarnissaat taamaaliornikkut nuna namminiilivikkiartortoq nunatta avataani ilinniariarsimasunittaaq kivitseqataaffigineqarluni ilusilersuiffigineqaqataasinnaassammat,” oqarpoq Namminiilivinnermut Naalakkersuisoq, Suka K. Frederiksen.

Avalammiit ilisimatitsissutigineqarpoq nunatta siunissaa ilinniartut akornanni oqaluuserineqartartoq. Naalakkersuisup kaammattuutigaa nunatta avataani ilinniagaqartut ilinniarnermi nalaanni nunatta siunissaa eqqartorneqartillugu peqataasaqqullugit. Tamannalu Avalammiit tigulluarneqarpoq; ilinniartummi angerlarlutik peqataarusupput akisussaaffimmillu tiguseqataarusullutik.

Namminiilivinnermut allaffeqarfik Avalaap suleqatigineratigut ilinniartut ilinniakkaminnik naammassinnereerlutik nunatsinnut utersinnaanissaat aqqutissiueqataaffiginiarlugu ajornartorsiutit misissugassallu ersarissarniarpai. Danmarkimi ilinniartut ilinniarnerminni nunatsinnut tunngasumik misissuillutik allaaserisaqassatillutik allaffeqarfik suleqatigisinnaavaat. Kalaallimi Danmarkimi ilinniartut kinaassuserput oqaatsivullu pingaartippaat, nunatsinnilu pingaartitat pissutsillu ilisimalluaramikkit misissuinermi tunngaviusut tutsuiginartut naapertuunnerusullu aallaavigisinnaallugit.


Namminiilivinnermut, Nunanut Allanut Nunalerinermullu Naalakkersuisoq, Suka K. Frederiksen ima oqarpoq:
“Ilinniartut Nunatsinnut pimoorussillutik suliaqarput, nunatsinnullu oqallinnermut peqataallutik, isumaasalu tusaanissaat inissaqartariaqarpoq. Oqallinneq ima sakkortutigilissanngilaq allaat kinaassuserput oqaatsivullu oqaluuserisinnaajunnaassallutigit. Avalak kaammattorusuppara oqallinneq ingerlatiinnasagaat, aamma Namminiilivinnissaq pillugu, politikkimut politikkerinullu atanngitsumik. Tusarnaassaanga.”

Annerusumik paasisaqarusukkuit Naalakkersuisup allattaa attavigiuk:
Naasunnguaq Olsen, tlf, 345414, e-mail: nasu@nanoq.gl attaveqarfigineqassaaq.