Naalakkersuisut suliffeqarnermi angutit arnallu naligiissitaanerulernissaata qulakkeerneqarnissaa sulissutiginiarpaat

Ulloq maajip ulluisa aallaqqaataat amerlaqisunut ulluusarpoq immikkuullarissoq. Nunarsuarmi sulisartut ulluat ulluusarpoq ileqquliussimasanik sammisassarpassuaqarfik, tassani ataatsimoorluta naleqartitatsinnik naligiinnerulernissamillu sulissuteqarluta anguniakkatut sulissutigisatsinnik, ataatsimoornerulernissatsinnik nammaqatigiinnerunissatsinnillu immitsinnut eqqaasittaratta. Anguniakkavut suli angoqqajanngilagut sulilumi sorsuutissarpassuaqarpugut. Taamaammat sukataartariaqarpugut iluarsaaqqinnerit pisariaqartinneqartut naammassiniarlugit.

Pingaartumik sulisartut aningaasarsiakinnerit akunnattunillu isertitaqartartut imaannaanngitsunik atugaqarput Naalakkersuisullumi pimoorullugu anguniagaraat inuiaqatigiinni naligiinnginnerup akiorneqarnissaa. Inunnik isumaginninnermut inatsisit ilarpassui ullutsinnut naleqqutinngillat pitsaanngitsumillu ilusilersugaallutik. Naleqqutinngitsut ilaat tassaapput ineqarnermut tapiissutit meeqqanullu tapiissutit.

Assersuutigalugu meeqqanut tapiissuteqartarnermut maannakkut malittarisassat malillugit aningaasarsiat annikitsuinnarmik qaffassimagaangata aningaasat tapiissutaasartut annikillingaatsiarneqarnerannik kinguneqartarpoq, tassami pisortanit ikiorsiissutit annikillisinneqarneri aningaasarsiat qaffariarnerannit annertunerusarmat. Nalunaaquttap akunneranut aningaasarsiat 1,50 koruuninik pitsanngoriarnerat inuit ilaannut aningaasat atorneqarsinnaasut annertuumik ikileriarnerannik kinguneqarsinnaavoq.

Tamanna siunertarineqanngisaannarsimavoq aamma pissusissamisuunngilaq. Taamaammat Naalakkersuisut ineqarnermut tapiissutit aamma meeqqanut tapiissutit iluarsaateqqinnissaat aallartippaat. Iluarsaaqqinnikkut isertitakitsut akunnattunillu isertitaqartartut taamatullu ilaqutariit meerartallit pingaartumik iluaquserneqassapput.

Erninermi sulinngiffeqarnissamut aningaasaateqarfik pilersinneqartussanngorpoq
Naalakkersuisut tamakku saniatigut suliffeqarnermi illuatungeriit suleqatigalugit meerartaarnermi sulinngiffeqarnissamut aningaasaateqarfimmik pilersitsiniarnerup sulissutigineqarnera aallartippaat. Naatsorsuutigineqarpoq erninermi sulinngiffeqarnissamut aningaasaateqarfik 2018 naaliinnartoq pilersinneqartoq.

Maannamut ajuusaarnaraluartumik assersuutissanik takusaqartarpugut arnat meeqqiorfimmik nalaaniittut suliffeqarfinnit tigujumaneqartanngitsut, suliffeqarfiit naartunermi erninermilu tamakkiisumik aningaasarsiaqartitsinissaannik pissuteqartumik. Maannakkut tamanna unitsinniarneqalerpoq naartusunut ernisunullu aningaasaateqarfimmik tapertaassussamik pilersitsinikkut, tassuuna qulakkeerneqassammat suliffeqarfiit aningaasarsianut aningaasartuutimik amerlanerpaartaannik naartusunut ernisunullu aningaasaateqarfimmit utertitsivigineqartalernissaat.

Erninermi sulinngiffeqarnissamut aningaasaateqarfik amerlasoorpassuarnit sivisuumik kissaatigineqartuarsimavoq Naalakkersuisullumi nuannaarutigaat suliffeqarnermi illuatungeriit suleqatigalugit maannakkut qanittumi anguniakkat piviusunngortinneqartussanngormata. Erninermi sulinngiffeqarnissamut aningaasaateqarfeqalernikkut isumannaarneqassapput suliffeqarnermi pitsaanerusunik naligiissitsisoqalernera, taamaalilluni arnat meeqqiornermi nalaanniittut tunulliutitaassanngimmata taamatullu ilaqutariit meerartallit naartunerup erninerullu nalaani naammaginartumik pilersuinissaminnut tunngavissinneqassammata.

Erninermi sulinngiffeqarnissamut aningaasaateqarfiup pilersinneqarnissaa pillugu inatsisissatut siunnersuut 2018-imi upernaakkut ataatsimiinnermi saqqummiunneqassasoq naatsorsuutigineqarpoq.

Naalakkersuisut sulisartut inuiaqatigiillu tamat sulisartut ulluannit pilluaqquagut.

 

Sara Olsvig
Isumaginninnermut, Ilaqutariinnermut, Naligiissitaanermut Inatsisinillu atuutsitsinermut Naalakkersuisoqarfik