Sapaatip-akunnerani 18-imi peqataagit

Sapaatip-akunnerani 18-imi imigassamik atueriaaseq sammisarparput. Ukioq manna qulequttami: ”Peqataagit” angajoqqaat inersimasullu allat kajumissaarneqarput meeqqat inuusuttullu sunngiffimmi sammisartagaqarnissaannik tapersersueqqullugit. Misilittakkanit, ilaatigut Islandimit, ersersinneqarpoq sunngiffimmi sammisaqartarneq inuusuttut tupamik, imigassamik aanngaajaarniutinillu allanik atuinissaannik pitsaaliuisartoq.

Peqqissutsimut Naalakkersuisup, Agathe Fontainip, illoqarfinnit aqqanilinnit nunaqarfinnillu 27-nit sapaatip-akunnerani 18-imi aaqqissugassanut tapiissutisinissamut qinnuteqaatit akuerivai.

-”Sapaatip-akunnera 18 malunnartikkumallugu soqutiginninnerup taama annertutiginera assut nuannerpoq. Illoqarfinni nunaqarfinnilu arlalinni ukioq manna qulequtaq “Peqataagit” innuttaasunut amerlasuunik pitsaasunik sammisassaqartitsinikkut malunnartinniarneqassaaq. Neriuppunga amerlasuut peqataassasut oqallilluartoqassasorlu,” taama Peqqissutsimut Naalakkersuisoq Agathe Fontain oqarpoq imalu nangilluni:

-”Inersimasuusugut akisussaaffigaarput meeqqatta inuusuttortattalu tupamik, imigassamik aanngaajaarniutinillu allanik atuinatik peqqissumik inooriaaseqarnissaannut tapersersornissaat. Taamaaliorsinnaavugut inuusuttut najornerisigut, oqaloqatiginerisigut, peqatiginerisigut sunngiffimmilu peqqissuutitsisunik sammisassaqarneranni tapersersornerisigut.”

Innuttaasut peqqissuunissaannik suliuniummi Inuuneritta II-mi meeqqat inuusuttullu atornerluilernissaannik pitsaaliuinissamik, inersimasut aalakoortut takussaasut ikilisarnissaannik sapinngisamillu imigassamik atuinerup annikillisinnissaanik anguniakkat sapaatip-akunnera 18-imi tunngavigineqarput.


Sapaatip-akunnera 18 pillugu uani paasisaqarnerugit: www.peqqik.gl/uge18


Paasisaqarnerujumallutit naalakkersuisup allattaa Nauja Møller attavigiuk: +299 58 26 54 imaluunniit e-mail: nmoe@nanoq.gl