Innuttaasut qimmeqarneq pillugu inatsit tusarnaarusuppaat

Avannaata Qimussersua Aasianni ingerlanneqarmat Uumasut nakorsaqarfia Inuussutissalerinermullu oqartussaaffik Kalaallit Nunaanni Qimussertartut Kattuffiat suleqatigalugu innuttaasunut tamanut ammasumik marsip 28-anni ataatsimiisitsipput.

Ataatsimiinnermi qimmeqarnermut inatsisip allanngortinneqarnera oqaluuserineqarneruvoq, allanngortinneqarnera januaarip aallaqqaataani 2017-imi atuutilerpoq. Inatsisimmi siunertarineqarpoq kalaallit qimmiat immikkuullarissuusoq allanik akuneqannginnissaa qimminit allanik nagguilinnit timip sananeqaataanik aamma akusaalinnginnissaa.
Kalaallit qimmii ukiuni kingullerni amerlasuuni ikiliartorput. Ikiliartornerinut pissutaasut tassaapput inuiaqatigiit aaqqissugaanerisa ineriartornerat, aamma qimmit nappaalaasarnerat tamatumunnga pissutaaqataalluni.

Qimmeqarneq pillugu inatsit allanngortinneqarmat nunatsinni siunertaraa qimmit tamarmik pinngitsooratik nalunaaqutserneqartalernissaat, microchippinik, qimmillu qimmit nappaataannut parvovirusimullu akiuussutissalersorneqartalerlutik, soorlu qimmit pinngitsooratik perlerornermut suli aamma akiuussutissalersorneqartartussaasut.
Akiuussutissalersorneqartarnissamut suliniut Inatsisartut ukiakkut 2016-imi ataatsimiinnerminni aalajangerpaat, suliniut 2020-ip naaneranut atuutsissalluni.

Uumasut nakorsaasa qimmit nappaataannik parvovirusimillu nassuiaassinerminnut ilannguppaat nappaatit allat tuniluussinnaasartut, upalungaarsimanissaq, qimmeqarneq uumasullu atugarissaarnissaat. Ataatsimiinneq amerlasuunik najuuffigineqarpoq qimmillillu aamma amerlasuut peqataapput. Ataatsimiinneq nuannersumik ingerlanneqarpoq ataatsimeeqataasullu apeqqutissaaleqeqinatik. Uumasut nakorsaqarfia Inuussutissalerinermullu oqartussaaffiup ataatsimiinneq iluatsilluartutut nalilerpaa.

Aasianni innuttaasunik ataatsimiisitsineq ataatsimiisitsisarnissanit siulliuvoq, ataatsimiisitsisarnissat ukioq manna aasaru ukiarulu pissassapput. Ataatsimiisitsinerup tullia Ilulissani sapaatip akunnerani 20-mi maajimi pissaaq. Soqutiginnittut tarmarmik peqataaqquneqarput.

Attavigineqarsinnaavoq: uumasut@nanoq.gl