Akuutitsineq oqaloqatigiissinnaanerillu aqqutissaapput

Meeqqanut inuusuttunullu pitsaanerusumik atugassaqartitsisoqassappat akuutitsineq oqaloqatigiissinnaanerillu aqqutissaapput

Isumasioqatigiinnermi qanittumi ulluni sisamani ingerlanneqartumi, ilaatigullu inunnik 50-it missaanniittunik kommuninit, ulloq unnuarlu paaqqittarfinnit, Isumaginninnermut Naammagittaalliortarfimmit, politiinit, Isumaginninnermut Aqutsisoqarfimmit allaniillu peqataaffigineqartumi nalunaarutinut ilitsersuutinullu arlalinnut ilanngussinissaq periarfissaasimavoq, taakkulu meeqqat tapersersorneqarnissaannut Inatsisartut inatsisissaattut siunnersuutip iluatsilluartunik piviusunngortinneqarnissaa qulakkiissavaat.  Isumasioqatigiinneq ulluni 23.-26. april Nuummi pivoq, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfimmiit ingerlanneqarluni. 

Meeqqat tapersersorneqarnissaannut inatsisissatut siunnersuut Inatsisartut upernaakkut ataatsimiinneranni suliarineqarpoq, matumanilu meeqqanut inuusuttunullu aamma meeqqanut immikkut ikiortarialinnut imaluunniit meeqqanut immikkut pisariaqartitalinnut illersuinissaq tapersersuinissarlu siunertarineqarput.   

Inatsimmut namminermut tunngatillugu nalunaarutinik ilaatigut nakkutiginninnernut, ilaqutariinnut paarsisartunut paaqqinnittarfinnullu tunngasunik arlalinnik suliaqartoqarpoq, peqataasullu tamakkununnga erseqqissaavigineqarput kinguneratigullu suleqatigiillutik sulianik suliaqartinneqarlutik.  Nalunaarutit ungasinngitsukkut tusarniaatigineqarni-arput, isumasioqatigiinnermilu paasisat nalunaarutinut tusarniaassutinut ilanngunneqassapput. 

Akuutitsineq pingaaruteqarpoq

”Inatsisinik nutaanik suliaqartilluta ulluinnarni tamakkuninnga sulialinnik akuutitsisarneq pingaaruteqarpoq.  Akuutitsineq oqaloqatigiissinnaanerillu meeqqanut inuusuttunullu pitsaanerusunik atugassaqartitsiniarutta siumut aqqutissaapput.  Taamaammat isumasioqatigiinnermi pineqarsimapput qanoq iliorluta inatsisit nalunaarutillu aqqutigalugit meeqqat inuusuttullu atugarisaannik nukittorsaasinnaanerput qulakkeersinnaassaneripput, soorlu tamanna inatsisissatut siunnersuummi siunertarineqartoq, oqarpoq Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig nangillunilu, "Isumasioqatigiinnermi suleriaqqinnissatsinnut piareersimanerulerpugut".   

”Kommuneqarfik Sermersooq-imi Meeqqanut, Ilaqutariinnut Atuarfeqarnermullu Ingerlatsivimmeersoq Helene Horsbrugh naapertorlugu isumasioqatigiinnerup ”kommunini pisortat sulisullu, ilaatigut politiinik peqateqarlutik, naalakkersuisoqarfiup qitiusumik allaffianut aggersarneqarnermikkut inatsissanik nalunaarutissanillu suliaqarnermi oqaasertaliunneqartussanut pitsaassusissaannullu qulakkeerinninnermi peqataasarnissaat sinaakkuserpaa. Isumaqarpunga taamatut suliniuteqarneq nersualaagassaasoq tassuunakkummi akuutitsilluarnissamik suleqatigiilluarnissamillu ilumoortumik piumassuseqartoqarnera ersersinneqarmat. Tamannami aqqutissarivarput meeqaanut ilaqutariinnullu suliassaqarfimmi unammilligassat annertuut ataatsimoorluta qaangerniassagutsigit ."

"Isumasioqatigiinneq imaqarluartoq sinerissamit suleqatigilluakkat peqatigalugit.  Meeqqat tapersersorneqarnissaannut inatsisissap imaarisai atornarnerit artornannginnerillu oqaluuserissallugit inissaqarsimavoq, taamaalilluni inatsit pitsaanerpaamik naleqqussarneqassammat, isumasioqatigiinneq iluaqutaalluartoq."

Ane Louise Løvstrøm, Meeqqanik, Inuusuttunik, Ilaqutariinnik Pinaveersaartitsinermiilu pisortaq.

Paasissutissat allat naalakkersuisut allattaanut saaffiginnilluni pissarsiarineqarsinnaapput: Nina Jul Larsen, oqarasuaat 53 93 71