Aalisakkanik misileraalluni 2017-imi aalisarneq

Trawler

Naalakkersuisut aalajangerput 2017-imi aalisakkanik misileraalluni arlalinnik aalisartoqassasoq aamma sumiiffiit aalisarfigineqarsimanngisaannartut misissuiffigineqassasut.

Naalakkersuisut imartarujussuatsinni misileraalluni aalisarnissaq pingaartittorujussuuaat. Taamaattumik aalajangerpugut aalisakkanik assigiinngitsunik misileraalluni aalisartoqassasoq, sumiiffiit aalisakkanik siumorneqarsimanngitsut aamma sumiiffiit aalisarfigineqarsimanngisaannartut aalisarfigineqassallutik.

Neriuutigaarput misileraalluni aalisarnermi nutaanik aalisarfiulersussanik siumiusoqarumaartoq. Misileraanerit 2016-imi aallartinneqarput, neriutigineqarporlu ukioq manna misileraalluartoqarumaartoq.

Misileraatitsinerit sumiiffinnillu aalisarfigineqarsimanngitsuni aalisarnissaq Naalakkersuisooqatigiit suleqatigiinnissaminnut isumaqatigiissutaannut naapertuulluinnarpoq, isumaqatigiissummi ima allassimasoqarluni:

“Aalisakkat tunisassiarineqarsinnaasut nutaat atorluarneqassapput, aammalu aalisarfiusinnaasuni nutaani misileraatitsilluni aalisartitsisoqartassalluni, taakkunanilu pisat nunatsinni suliarineqartussanngorlugit tulaanneqartarnissaat aqqutissiuunneqassaaq”.

Misileraalluni aalisarneq ima nassuiarneqarsinnaavoq, uku siunertaralugit aalisarnertut:

  • aalisagaqatigiinnik misissuineq, ilisimasaqarfigineqanngitsut
  • aalisarfinnik misileraaneq, ilisimasaqarfigineqanngitsut
  • aalisariaatsit atortullu nutaat atorlugit aalisarnermik misileraaneq

Aajuku sumiiffinni aalisarfiusimanngitsuni misileraanissamut, misileraalluni aalisarnissamut aamma nutaanik atortoqarluni aalisarnermik misileraanissamut piumasaqaatit.

Sumiiffinni aalisarfiusimanngitsuni misileraaneq

Aalisakkat: Qalerallit, saarulliit, suluppaakkat, nataarnat aamma Tunup sineriaata qanittuani najorpilikkat, qeeraasat

Piumasaqaatit: Ningittakkat, qassutit, pullatit qassutillu nunamut pituttakkat atorneqarsinnaapput. Sineriammit avammut 3 sømilip killeqarfianit 3 sømilit angullugit aalisartoqarsinnaavoq. Ingerlatseqatigiiffiit qinnuteqartut aalisarnermut pilersaarutsik Naalakkersuisoqarfimmut nassiutissavaat. Ingerlatsiveqatigiit aalisarnermut pilersaarumminni nassuiaatigissavaat imartaq qanoq annertugisoq - siammasitsigisoq misileraalluni aalisarfiginiarlugu.

Aalisakkat: Tunumi saattuat

Piumasaqaatit: Pisassiissutit 500 tonsiupput. Tunumi saattuarniarneq avataani sinerissallu qanittuani pisinnaavoq. Amerlanerpaamik aalisariutit marluk akuersissutinik pisinnaapput. Pullatit atorneqarsinnaapput.

Aalisakkat: Kitaani avaleraasartuut

Sinerissap qanittuani aalisarneq

Piumasaqaatit: Kitaani sinerissap qanittuani avaleraasartuunik killeqanngitsunik aalisagartassiisoqarpoq. Kitaani sinerissap qanittuani aalisarnissamut akuersissutillit tamarmik misileraalluni avaleraasartoorniarnissamut akuersissummik pisinnaapput. Sinerissap qanittuani aalisarnermit Pinngortitaleriffimmut misissugassanik nassiussisoqartassanngilaq.

Avataani aalisarneq

Piumasaqaatit: Kitaani killeqanngitsumik aalisarnissamut akuersisoqarsinnaavoq.

Aalisarneq: Kitaani ammassassuit, ammassat aamma saarullernat

Piumasaqaatit: Qalorsuit ungersortakkat qalorsuillu aalisarnermi atortorineqarsinnaapput.

Aalisarneq: Tunumi 67N-ip avannaani raajarniarneq.

Piumasaqaatit: Tunumi 67N-ip avannaani raajat 500 tonsit pisassiissutaapput.

Aalisakkanik ilisimaneqanngitsunik aalisarneq

Aalisarneq: Tunumi Kitaanilu kapiliusanik aalisarneq

Piumasaqaatit: Pisassiissutit 3.500 tonsiupput. Pisassiissutaasut killeqanngitsumik aalisartoqarsinnaapput. Aalisariutit guldlaksinik misileraalluni aalisarniartut suluppaagarniarnissamut saarullinniarnissamullu akuersissuteqareersut aalisarsinnaapput. Saniatigut pisanut piumasaqaatit nalinginnaasut naapertorneqassapput.

Aalisarneq: Tunumi Kitaanilu putooruttunik, tobisinik aalisarneq

Piumasaqaatit: Pisassiissutit 3.000 tonsiupput. Saniatigut pisanut piumasaqaatit nalinginnaasut naapertorneqassapput.

Aalisarneq: Tunumi peqquserusit, toldkrabbit

Piumasaqaatit: Taakku aalisariutinik amerlanerpaamik marlunnik aalisarneqarsinnaapput. Pullatit atorlugit aalisarsinnaanermut akuersisoqassaaq.

Aalisariaatsit atortullu nutaat atorlugit aalisarnermik misileraaneq

Aalisarneq: Kitaani eqalukkanik, polartorsk, eqalugaasanillu, istorsk, aalisarneq

Piumasaqaatit: Eqalukkat 5.000 tonsit eqalugaasallu aamma 5.000 tonsit pisassiissutaapput. Qalunik, qalunik ungersortakkanik aamma pullatinik aalisarneqarsinnaapput.

Misileraalluni aalisarnissamut akuersissutinik 2017-inimi ataavartumik qinnuteqartoqarsinnaavoq. Misileraalluni aalisarnissamut qinnuteqartoqarsinnaavoq, immersuiffissaq atorlugu qinnuteqartoqarsinnaalluni.

Misileraalluni aalisarsinnaanermut akuersissutit qinnuteqareernikkut pineqarsinnaapput. Akuersissutit taamaallaat ingerlatsiveqatigiiffinnut nunatsinneersunut tunniunneqassapput.

Pinngortitaleriffiup aamma Aalisarnermut Piniarnermullu Naalakkersuisoqarfiup innersuussutai tunngavigalugit misileraalluni aalisartoqassaaq. Misileraalluni aalisartoqareerpat aalisarneq pillugu nalunaarusiortoqassaaq.

Aalisakkanik qulaani taaneqanngitsunik misileraassalluni kissaateqartoqarpat, Aalisarnermut Piniarnermullu Naalakkersuisoqarfimmut saaffiginnittoqarsinnaavoq; apnn@nanoq.gl

Attavigineqarsinnaavoq Aalisarnermut Piniarnermullu

Naalakkersuisoqarfimmi pisortaaneq, Jørgen Isak Olsen. Mail: JIO@nanoq.gl

Ugguuna qinnuteqarfissaq aaneqarsinnaavoq