NUNAOIL A/S-imi ingerlatanik annikillisitsineq

Namminersorlutik Oqartussat aamma NUNAOIL A/S-imi siulersuisut – Ataatsimoorlutik tusagassiuutitigut nalunaarutaat

Ingerlatseqatigiiffimmi ingerlatat annikillisinniarlugit, NUNAOIL A/S-imut piginnittut aamma siulersuisut isumaqatigiillutik aalajangerput. Annikillisitsineq Kalaallit Nunaanni uuliasiorluni misissuinermi suliat annikilliartornerisa kinguneraat 

NUNAOIL A/S 1984-imi pilersinneqarpoq, Kalaallit Nunaanni ikummatissiassarsiorluni ingerlatani kalaallit aamma danskit ataatsimoorussamik pisortatigoortumik peqataanissaasa isumagineqarnissaa siunertarineqarluni. 2009-imi Namminersornermut inatsisip atuutsinneqalernerani, Namminersorlutik Oqartussat ingerlatseqatigiiffimmik kisimiillutik piginnittuulerput. Ingerlatseqatigiiffiup suliassaa tassaasimavoq Namminersorlutik Oqartussat ikummatissiassarsiornissamut akuersissutini peqataanerannik, kiisalu Kalaallit Nunaanni avataanilu suliassanik, tamatumunnga pissusissamisoortumik attuumassuteqartunik isumaginninnissaq.

Ukiuni kingulliunerni nunarsuarmi uuliasiornermut suliffissuaqarnermi annertuunik allanngortoqarpoq. Tamatuma ilaatigut malitsigisaanik Kalaallit Nunaanni uuliasiorluni misissuinissamut soqutiginninneq annikillivoq. Taamaattumik ullumikkut uuliasiorluni misissuinermi ingerlatat, ukiualuit matuma siorna naatsorsuutigineqartunit aammalu neriuutigineqartunit annikinnerupput. Uuliasiorluni misissuinermi ingerlatat annikillinerisa kingunerisaanik piginnittut aamma siulersuisut atituumik isumaqatigiillutik, NUNAOIL A/S-imi ingerlatat annikillisinneqarnissaat aalajangiuppaat.

Ingerlatseqatigiiffiup atorunnaarsinneqarnissaa pineqanngilaq. Ingerlatseqatigiiffik ullumikkut pisarnermisut suliaqassaaq,  annikinnerusumilli naleqqussarneqartumik ilusilimmik suliaqassalluni. Suliffeqarfimmi piginnittutut akisussaaffeqartutut allatuulli, aaqqissuussaaneq naleqqussarparput, taamaalilluni ingerlatseqatigiiffik niuernerup inissisimaffianut nutaamut nalimmassarneqassalluni.” Aatsitassanut Ikummatissanullu Naalakkersuisoq, Múte Bourup Egede oqarpoq.

Aatsitassanut Ikummatissanullu Naalakkersuisoqarfiup NUNAOIL A/S-imi pisortat peqatigalugit, qaammatini tulliuttuni marlunni ingerlatseqatigiiffiup allatut aaqqissuunnissaanut pilersaarut suliarissavaa. Suliami ingerlasussami ingerlatseqatigiiffiup aaqqissuussaanikkut katitigaanera, niuerfimmi atugassarititaasunut nutaanut nalimmassarnissaa isiginiarneqassaaq. Taamatuttaaq inatsisip allanngortinneqarnissaa sulissutigineqarpoq, tassani ilaatigut siulersuisuni ilaasortat tallimaniit pingasunut ikilisinneqarsinnaallutik. Pilersaarut ingerlatseqatigiiffiup nalinginnaasumik ataatsimeersuarnerani saqqummiunneqassasoq naatsorsuutigineqarpoq.

“NUNAOIL A/S ukiuni kingullerni niuerfimmi unammillernartumi sulisimasoq siulersuisut eqqumaffigaat. Taamaattumik sulisut atugassarititaasut ajornakusoortut  atuunnerani atorfimminnut tunniusimallutik sulisimanerannut qutsavigerusuppagut.”  NUNAOIL A/S-imi Siulersuisut siulittaasuat, Stine Bosse oqarpoq.

Aaqqissuussaanermut nutaamut ikaarsaarnissaq qaammatit 12-it missaannik sivisussuseqassasoq siulersuisut naatsorsuutigaat.

Paasissutissat annertunerusut

Jørgen T. Hammeken-Holm, Naalakkersuisoqarfimmi pisortaaneq, Aatsitassanut Ikummatissanullu Naalakkersuisoqarfik

oqarasuaat: +299 346 846, e-mail: joeh@nanoq.gl

Stine Bosse, NUNAOIL A/S-imi Siulersuisunut siulittaasoq

oqarasuaat: +45 21 23 24 25, e-mail: stine.bosse@gmail.com