Tunngaviusumik inatsisissaq pillugu isumalioqatigiissitaq pilersinneqarpoq

Inatsisartut Naalakkersuisullu tunngaviusumik inatsisissamik suliaqartoqarnissaanik aalajangiisimammatta tunngaviusumik inatsisissaq pillugu isumalioqatigiissitamik pilersitsipput. Kalaallit Nunaata tunngaviusumik inatsisissaata tunngavissaanik suliaqarneq aallartippoq. Aatsaat Kalaallit Nunaanni inuiaat oqartussaaqataanerat aqqutigalugu inatsimmik tunngaviusumik suliaqartoqarnialerpoq.

Isumalioqatigiissitami politikkikkut atituumik aallartitaqarfiunissaa kissaatigalugu isumalioqatigiissitaq katitigaassaaq. Isumalioqatigiissitami ilaasortat arfineq-marluupput, partiillu Inatsisartuni ilaasortaatitai naapertorlugit agguataagaapput. Inatsisartuni partiit isumalioqatigiissitamut ilaasortassanik inassuteqaqquneqarput.

 

Ukulu ilaasortanngortinneqarput:

Siulittaasoq: Vivian Motzfeldt (Siumut)

Siulittaasup tullia: Ane Hansen (Inuit Ataqatigiit)

Ilaasortat: Jess Svane (Siumut), Mimi Karlsen (Inuit Ataqatigiit), Per Rosing-Petersen (Partii Naleraq), Mala Høy Kúko (Atassut).

Tamatuma saniatigut Demokraatinit aallartitamut inissaq ataaseq inuttaqanngilaq. Demokraatit maannakkorpiaq ilaasortassamik toqqaaniaratik aalajangersimapput.

Namminersornermut, Nunanut Allanut Nunalerinermullu Naalakkersuisoq Suka K. Frederiksen ima oqarpoq:

Kalaallit tunngaviusumik inatsisissaannik suliaqarneq namminersulernissap tungaanut alloriarnerussaaq pingaarutilik. Taanna siunissaq eqqarsaatigalugu suliaavoq, aammalu namminersortutut naalagaaffinngornissamut aqqutissamut piareersarnerit pingaarutillit ilagaat. Tunngaviusumik inatsit ataatsimoorluta naleqartitatsinnik kulturitsinnillu tunngaveqassaaq. Kikkut tamarmik suliassami suleqataanissaat pisariaqartinneqarpoq.”

Tusagassiortunik katersortitsinermit assit takukkit

Kalaallit Nunaata tunngaviusumik inatsisissaa pillugu isumalioqatigiissitaq immikkoortunik marlunnik siunnersuusiussaaq. Immikkoortoq siulleq Namminersorlutik Oqartussat ataanni atuutilersinneqarsinnaassaaq danskillu naalagaaffiannut killissaliinerup iluani Kalaallit Nunaannut tunngatillugu danskit naalagaaffiata tunngaviusumik inatsisaannut tapertaasinnaassalluni. Immikkoortup aappaa Kalaallit Nunaat tunngaviusumik inatsimmit danskillu naalagaaffiannit ilaajunnaarpat, aammalu inuiaat kalaallit namminiilivittutut naalagaaffeqalerpata aatsaat atuutilersinnaassaaq.

Isumalioqatigiissitattaaq suliassaasa ilagissavaa Kalaallit Nunaat namminiilivippat naalagaaffimmik allamik suleqateqarnermut, soorlu Free associationimik taasatut suleqateqarnermut, missingiummik aalajangersaassalluni. Isumalioqatigiissitami sulineq nammineerluni aaqqissugaassaaq, ilaatigullu suleqatigiissitalianik pilersitsisoqartarsinnaassaaq.

Tusagassiortunik katersortitsinermit immiussaq tusarnaaruk

Tusagassiortunik katersortitsinerup immiunneqarnera aamma isiginnaarsinnaavat:

 

Annerusumik paasisaqarusukkuit Naalakkersuisup allattaa attavigiuk:

Naasunnguaq Olsen, tlf, 345414, e-mail: nasu@nanoq.gl attaveqarfigineqassaaq.