NAKUUSA Kalaallit Nunaanni ataatsimoorfiuvoq

NAKUUSA Kalaallit Nunaanni ataatsimoorfiuvoq – oqaatsit, suminngaanneerneq kultuurilu apeqqutaatinnagit

 

Poorskikkut ingerlanerini Facebook-mi inuttut ataasiakkaatut isummersuummik allattoqarpoq Sermitsiaq.ag-mi facebook-milu annertuumik oqallisigineqartumik. Saqqummiussaq NAKUUSA-mi sulisuusumit allanneqarpoq, sukangasumik oqaasipiluttumillu kalaallit dansk-isuinnaq oqaasillit kajumissaarlugit kalaallisut ilinniaqqullugit.

NAKUUSA-mut tunuliaqutaallutik suleqataasut, Naalakkersuisoq Sara Olsvig kiisalu UNICEF Danmark-mi generalsekretæriusoq Steen M. Andersen allaatigisami saqqummiussat NAKUUSA-p isumaqatigineraa arlalinnit paasisaqarumallutik saaffigineqarput. Sara Olsvig Steen M. Andersen-llu allaatigisami toriitsumik nipi oqaatsillu atorneqartut illersorsinnaanagit sakkoortuumik oqaatigaat erseqqissaassutigaallu allaatigisaq minnerpaamilluunniit NAKUUSA sinnerlugu isummersuutaanngimmat, sulisuusulli inuttut ataasiakkaatut nammineq oqariartuutigimmagit.

”UNICEF-mi taamatullu NAKUUSA-mi sulissutigaarput Naalagaaffiit Peqatigiit Meeqqat pisinnaatitaaffii pillugit isumaqatigiissutaat tunngavigalugu siuarsaassalluta. Erseqqissarnerusinnaanngilarput NAKUUSA nuna tamakkerlugu meeqqanullu TAMANUT, taakkulu soqutigisaannut ataatsimoorfiummat – oqaatsit, suiaassuseq, inuiaqatigiinni inissisimaneq, upperisaq kultuurilu apeqqutaatinnagit.” UNICEF Danmark-mi generalsekretæri Steen M. Andersen oqarpoq.

Taamatuttaaq Sara Olsvig, Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoq erseqqissaavoq oqariartuut Naalakkersuisut Naalakkersuisoqarfilluunniit sinnerlugu oqariartuutaanngimmat.

”Meerartavut tamakkerlugit oqaatsinik arlariinnik ilinniarnissaannut nuannersumik kaammattussavagut”, Naalakkersuisoq Sara Olsvig oqarpoq, nangillunilu:

”Tamatta isummatta anninnissaannut pisinnaatitaaffeqarpugut, taamaattorli kaammattuutigaara, oqallinneq facebook-mi allaniluunniit ingerlanneqaraluarpat, tunngavilersukkamik kinaassusersiunngitsumillu ingerlateqqullugu. Pingaartumik meerartavut eqqarsaatigalugit oqalliseriaatsitsigut maligassiuisussaavugut. Naalakkersuisut pitsaasumik kinguneqartussanik oqaatsit pillugit oqallinneq illersorpaat, oqallinnerlu inuiaqatigiinni suli annertunerusumik avissaartuutsitsisoq illersornagu. Meeqqat pisinnaatitaaffii pillugit sulinitsinni, pisussaaffigaarput meerartatsinnut maligassiuisuussalluta, ataatsimoortitsisumik torersumillu nipeqarluta, aamma oqaatsit pillugit oqallinnermi”.

Meeqqat pisinnaatitaaffii pillugit isumaqatigiissut oqarpoq, meeqqat kultuurertik, upperisartik oqaatsitillu naapertorlugit inuunissaminnut pisinnaatitaaffeqartut. Tamannalu inersimasunit qulakkeerneqarlunilu tapersersorneqassaaq.

Naalakkersuit aamma UNICEF oqaatsit annertuumik isumaqarmata oqaatsillu pillugit oqallinneq pingaaruteqarmat erseqqissarumavaat, kisianni aamma kalaallisut ataasiinnarmik oqaaseqaraluaraanniluunnit imaluunniit dansisut oqaaseqaraanni misigissutsinik amerlasuunik qaffakaatitsisarmat ilisimaaraarput. Pingaaruteqarpoq inersimasut tamarmik pissuserissaartumik tunngavilersorluakkamillu aallavilimmik sammisamut takutsitsinissaat, taamaalilluta kinguaariit tulliuttunut maligassiuilluta.

 

Paasisaqarnerorusuttut attavigisinnaavaat:

UNICEF Danmarkimi generalsekretæri Steen Andersen, SAndersen@unicef.dk

Naalakkersuisumut allatsi Nina Jul Larsen, Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik, nina@nanoq.gl