Namminiilivinniarpugut naligiilluta ingerlaqqinniassagatta

Namminiilivinnermut, Pinngortitamut, Avatangiisunut Nunalerinermullu Naalakkersuisoq Suka K. Frederiksen Sisimiuni innuttaasunik ataatsimiititsinermi tikilluaqqusinermini ima oqarpoq:” Inuiaqatigiit patajaatsut  imaliallaannarlutik uppisinneqarsinnaanngitsut pilersinneqassagunik inuiattut ataatsimoornerput pilersittariaqarparput,”

Sisimiuni innuttaasunik ataatsimiititsinermi uummaarissumik inuusuttut utoqqaallu akornanni oqallittoqarluarpoq. Qulequttat saqqummiunneqartut amerlapput, ataatsimut isigalugit aaqqissuuseqqinnermik arlariinnik piumasaqaateqarfiullutik. 

Eqimattat akornanni saqqummiunneqartut amerlapput, ilagaat:

“1979-mi 2009-lu oqartussaaffinnik tigusinermi kukkussutit nangeqqinneqartariaqanngillat, inatsisit allanngortinnagit ingerlateqqiinarneqarlutik. Namminiilivinnermi inatsisit nunatsinnut tulluartut pilersinneqartariaqarput.”  

“Politikerit sapiissuseqartariaqarput allannguinissamik aalajangiinissamut”

“Inuup nammineersinnaassusia inerisarneqartariaqarpoq”

“Pisaaneq allanut tigummineqarpoq, taamaattussaannartut isigileqqavarput. Pissutsit tamaattut qimattariaqarpavut.”

 “Kalaallit kalaallisut atuassallutik sungiusarneqanngilaat, imminut piumaffigineq annerusariaqarpoq, aamma oqaatsitigut”

“Namminiilivinneq inummiippoq, uagut Sisimiunit namminiilivinneq atuutsereerparput”

“Ilisimatusarnikkut immikkut avataaneersut piumaffiginerusariaqarpagut, qassiit avataaniit “doktorinngorpat” uagut ilisimasagut atorlugit”

Eqqarsaassiissummik tunerusuppassi. Taamani Lumumbap nalaani kalaallit inuaqatigiit matoqqasuupput, taamanikkut tupinnarpallanngilaq taamaattut.

Uagulli periarfissanik ulikkaarpugut, ikiortinniarnerpulli utaqqiinnartarparput. Uffa namminiussuseqarluta.”  

Namminiilivinnermut Naalakkersuisoq Suka K. Frederiksen oqallinnerup nalaani Jørgen C. F. Olsen “Lumumba”-p 1966-mi oqaatiginikuusai issuarlugit oqarpoq: “Kalaallit ukiorpassuit ingerlaneranni silarsuup inuuffigiuminaannerpaani silarsuup inuuffigiuminaannerpaartaani imminnut puttassimasut, sapinngilluinnarput...inuiaqatigiilli ineriartortinneqarneranni peqataassagaanni kialluunniit akisussaaffini nammattariaqarpaa...Piumassuseq sulerusunnerlu malunnartumik amigaatigaagut. Inuusuttut naparliinnartut sulisinneqartariaqaraluarput, sulinerup pilluaqqussutaa misigisinnaanngoqqullugu. Suliaq pilluaatissamik inummut tunisisarpoq, inuunermilu pilluaatissaq annerpaaq sulinermiippoq.” Naggaasiillunilu Naalakkersuisoq oqarpoq: “naak ukiorpassuit qaangiukkaluartut oqaatsit atorneqartut suli ullutsinnut tulluarput.”

 

Naggasiilluni Namminiilivinnermut Naalakkersuisoq Suka K. Frederiksen oqarpoq:” akuereqatigiinneq anguniarlugu avissaarniarpugut. Naligiilluta naapeqatigiittalernissarput anguniarlugu. Inuiaqatigiittut immikkuullarissutigut atorlugit ingerlariaqqilluta.

   

Annertunerusumik paasisaqarusunnermi naalakkersuisup allattaa Naasunnguaq Olsen, tlf. 34 54 14, e-mail: nasu@nanoq.gl attaveqarfigineqassaaq.