Sinerissamut qanittumi raajanik pisassiisoqassanngikkallarpoq

Sinerissamut qanittumi raajanik pisassiisoqassanersoq Naalakkersuisut tamarmiullutik aalajangiiffigiumaaraat Kim Kielsenip erseqqissaatigaa

Kommune Kujallermi sinerissamut qanittumi aalisarnermik inuussutissarsiuteqarnerup siuarsarneqarnissaa siunertaralugu aallartitsiniartut tapersersorniarlugit pilertortumik immikkut ittumik pisassiisoqassasoq neriorsuutigisinnaaneraa Kim Kielsen aperineqarami akivoq, oqarluni pisassiisoqassappat Naalakkersuisut ataatsimoorlutik tamanna aalajangiiffigiumaaraat, tamannalu pitinnagu pisassanik tunniussisoqassanngitsoq.

Kujataani sinerissamut qanittumi raajarniarnerup siuarsaavigineqarnissaa siunertaralugu pisassanik immikkut pilertortumik tunniussisoqarsinnaanersoq Kim Kielsenip aperineqarnera pivoq sapaammi 2. apriili Naalakkersuisut siulittaasuat Qaqortumi innuttaasunik ataatsimiititsimmat. Taamali apeqquteqartoqarnissaa sioqqulluguli Naalakkersuisut siulittaasuata Kim Kielsenip innuttaasunik ataatsimiititsineq aallarnerlugu Naalakkersuisut anguniagaat suliaallu pillugit saqqummiinermini erseqqissumik oqaatigaa sinerissamut qanittumi raajanik immikkut ittumik pisassiisoqarnissaa piffissami qaninnerpaami naatsorsuutigineqassanngitsoq:

”Sisimiuniit kujammut sinerissap qanittuani misileraatitut raajanik pisassiisoqarnissaanut periarfissiisoqarsinnaanersoq Pinngortitaleriffik suleqatigalugu misissuiffigaarput, kisiannili erseqqissaatigissavara Naalakkersuisut suli tassunga tunngatillugu isummernikuunatillu aalajangiussaqarnikuunngillat. Aamma allaat tusarpara maani kujataani aalisartut kattullutik angallatitaarnissaannik kajumissaarisoqareersimasoq. Uangali oqarusuppunga tamanna utaqqissutilaarneqartariaqartoq. Naalakkersuisut suli tamatumunnga tunngatillugu aalajangiussaqanngillat”, Kim Kielsen oqarpoq.

Naalakkersuisut siulittaasuat Kim Kielsen Qaqortumi Campus Kujallermi innuttaasunik ataatsimiititsimmat peqataajartorlutik takkuttut inuit 60 missiliorlugit amerlassuseqarput.

Innuttaasunik ataatsimiititsinerup aallartivinnissaa sioqqullugu Kommune Kujallermi borgmesteri Jørgen Wæver Johansen Naalakkersuisut siulittaasuat illoqarfimmut kujataanullu tikilluaqqullugu oqaaseqarpoq. Jørgen Wæver Johansenilu innuttaasunik ataatsimiititsisoqarnerani qulequttat suut tusagaqarfigissallugit Kommune Kujallermiit soqutiginartinneqarnerunersut pillugit saqqummiussivoq.

Jørgen Wæver Johansen tikilluaqqusilluni oqaaseqareermat Naalakkersuisut siulittaasuat Kim Kielsen Naalakkersuisoqatigiit anguniagaat Naalakkersuisoqarfinnilu suliat pillugit saqqummiussivoq.

Innuttaasut Kim Kielsenimut toqqaannartumik apeqquteqarnissaminnut periarfissinneqarmata aperiniarlutik allatsitut arfineq pingasuupput. Tassanilu apeqqutigineqartut ilagaat suliffeqarfinnik assigiinngitsunik Nuummiit sinerissamut nussuiniarneq sumut killissimanersoq, Qaqortumi ilinniartoqarfiusumi kollegialiortiterneq qanoq pilersaaruteqarfigineqarnersoq, ilinniarfinni ilinniartunngortartut amerlineqarsinnaanissaat aqqutissiuunniarneqarnersoq, Namminersorlutik Oqartussat umiarsuaatileqatigiiffiutaanni Royal Arctic Linemi inuttat kalaalinngorsarneqarnissaannut tunngasut, misileraatigalugu puisit neqaat atorlugit avannaani qimminut nerukkaatissaliortalernissamik inerisaarusuttut tapiiffigineqarnissaat politikikkut aqqutissiuunneqarusunnersoq, kiisalu kujataani talittarfinnik piorsaasoqarsinnaaneranut tunngasut.

Naalakkersuisut siulittaasuata innuttaasut apeqqutigiumasaat tamakkerlugit akissuteqarfigereeramigit naggasiutigalugu inuiaqatigiinni pissutsit iliuuseqarfigineqartariaqarnerpaatut nammineerluni isumaqarfigisani pillugit saqqummiivoq.

Naalakkersuisut siulittaasuata naggasiilluni oqaaseqarnera pillugu allaaserisaq takuuk, imaluunniit naggasiilluni saqqummiussinermiit immiussaq nammineerlutit tusarnaaruk.

Naalakkersuisut siulittaasuata innuttaasunut ataatsimiititsinissaa tulleq Paamiuni Katersortarfimmi arfininngornermi 8. apriili 2017-imi nal. 14.00 pissaaq.

Innuttaasunik ataatsimiititsinermit assilisat takukkit.

 

Paasisaqarnerorusuttut attavigisinnaavaat Naalakkersuisumut allatsi Dines Mikaelsen mobil +299 58 37 54 imaluunniit e-mail dimi@nanoq.gl.