Namminersuleriartornerup aqqutaani innuttaasunik katagaassanngilagut

Namminiilivinnissap sulissutiginerani innuttaasut ilaqutariittut inuunerat, ulluinnarni inuunerat sulinerallu pingaarnertut nukigalugit nunatta imminut napatikkiartuaartinneqarnissaa Naalakkersuisut siulittaasuata pingaartippaa.

Nunatta namminersulivinnissaa pivisumik nuannaarutissartaqassappat inuiaqatigiit suleqataasinnaanngorlugit ineriartortitsisoqalernissaa salliullugu anguneqartariaqarpoq.

”Nammineerlunga meeraallunga atuaqatikka kammalaatikkalu ilaatigut eqqarsaatigisarpakka - ilarpassui akornatsiinniikkunnareersimapput. Ukiut qulit ingerlaneranni nunatsinni innuttaaqatittaa ilaat 500-t imminnut toqupput, taakkunanngalu meeqqat 60-t missaanniittarlutik. Nunatta namminiilivinnginnerani inuiaqatigiinni atugarliuterpassuit allat iliuuseqarfigisariaqakkavut salliullugit iliuuseqarfigisimanngikkutsigit, taava namminiilivinnissarput immini suussava?”, Kim Kielsen oqarpoq nangillunilu:

”Ullumikkut namminersulivinnissarput sumut atussavarput kinguaassavut apersortariaqartartussaappata: Naak ilakka, naak meeraallunga atuaqatikka, naak kalaaleqatikka peqatissakka”, Naalakkersuisut siulittaasuat Kim Kielsen Qaqortumi innuttaasunik ataatsimiitsitsinermini ilaatigut taama oqarpoq. 

Naalakkersuisut siulittaasuat Kim Kielsen sapaammi 2. apriili ualikkut Qaqortumi innuttaasunik ataatsimiititsimmat peqataajartorlutik Campus Kujallermut takkussimasut 60-it missiliorpaat. Ataatsimiititsineq naggaserlugu Naalakkersuisut siulittaasuat isummaminik eqikkaalluni oqaaseqarmat peqataajartorlutik takkussimasut tamakkerlutik nipaaruteqqinnaarlutik tusarnaarput.

Peqatissagut nukittuujusariaqarput

Naalakkersuisut siulittaasuata Kim Kielsen-ip qularpalunngivilluni oqaatigaa nunarput ullut arlaani namminersulivikkumaartoq, taamaattumillu taassuma angujartuaarneqarnerani akimmiffiusinnaasut piiarniarlugit ukiuni makkunani suliarineqartariaqartut:

Nunatta namminiilivinnissaata angujartuaarneqarnerani innuttaasut kikkuugaluartulluunniit suleqataasariaqarput, taamaattumik nunatsinni pisussutsit pingaarnerpaartaat, tassalu innuttaasut, ilinniarluarsimallutillu sutigut tamatigut nukittuujunissaat ukiuni makkunani sulissutigisariaqarparput – suliassagullu amerlaqaat,” Kim Kielsen oqarpoq.

Naalakkersuisut siulittaasuata Kim Kielsen-ip Qaqortumi innuttaasunik sapaammi 2. apriili ataatsimiititsinermini naggasiinera eqikkaraanni ilaatigut taama imaqarpoq. Naggasiineq taanna tamakkerlugu nammineerlutit tusarnaarsinnaavat.

Innuttaasunik ataatsimiititsinermit assit.

Innuttaasunik ataatsimiititsinermit tusagassiorfinnut nalunaarutip aappaa "Sinerissamut qanittumi raajanik pisassiisoqassanngikkallarpoq" aamma atuarsinnaavat.

Paasisaqarnerorusuttut attavigisinnaavaat Naalakkersuisut allatsi Dines Mikaelsen mobil +299 58 37 54 imaluunniit e-mail dimi@nanoq.gl.