Nuup eqqaani nunaannarmi snescooterertoqarnerani inatsisinik annertuumik unioqqutitsisoqartartoq

Kalaallit Nunanni Aalisarsinnaanermut Akuersissutinik Nakkutilliisoqarfik, KANUAANA, inuussutissarsiutigalugu piniartut Nuup Akiani snescooterertoqartarnerarlugu maalaarfigisimavaat. Snescooterertoqartarnera uppernarsiniarlugu misissuinermi snescooterit nunaannarmi aqqutigisimasarpassui siumorneqarput illuaqqallu silataanni snescooterit naammattoorneqarlutik.

Aammattaaq Uttoqqarmiut Kangerluarsunnguata paavanit, Amitsuarsummiit snescooterit 10-15-it Nuummukartut snescootererlutik aallartut paasineqarput. Unioqqutitsinerit pineqartut assingisaallu ukiuni arlalinni pisarsimapput.

Snescooterertut Nuummukarnerminni tuttoqarfippassuit aqqutigalugit ingerlaarput, soorlu assersuutigalugu Eqaluit Paarliit timaat, Qasigiannguit timaat, Kangerluarsunnguup Tasersua, Nipaatsoq, Naajaat Kuuat, Kilaarsarfik kiisalu Aputitooq. Kapisillit eqqaanniit nalinginnaasumik aqqutigisartakkamikkut Nuummukarlutik.

Kangerluarsunnguup Tasersuata kangimut isuanit Amerallap saqqaanut, Tummerallip Tasersuanut, Austmannadalip eqqaatigut snescooterertut ingerlaarput, tamannalu nuna 2008-mili eqqissisimatitaalluni. Nuna eqqissisimatitaasoq ingerlaarfigineqartoq 30 kilometerit missaanni isorartutigivoq.

Taassuma kingorna aamma Aalisarnermut Piniarnermullu Naalakkersuisoqarfik KANUAANA-lu Ilulialimmi, Qussummi aamma Kikialinni inatsisinik unioqqutitsisumik nunaannarmi snescooterertoqartoq paasivaat, snescooterillu assartuummik Nuummeersumik assartorneqartut assilisimallugit, uppernarsaatigineqarlutik.

Aalisarnermut Piniarnermullu Naalakkersuisup Hans Enoksenip iluarinngilluinnarpaa nunaannarmi snescootererfioqqusaanngitsumi unioqqutitsilluni snescooterertoqartarmat.

- Akuersaarsinnaanngilluinnarpara snescooterertartut tuttunik uumasunillu allanik akornusersuisarmata, tuttut ukiup taamaalinerani akornusersorneqarnissaminnut nukissaqartorsuuneq ajormata. Akornusersuinerit kulavaat ikinnerujussuarnik piaqqiulernerinik kinguneqarsinnaavoq, akuersaarneqarsinnaanngilluinnarporlu nukittunerpaaffiginngisaanni pisariaqanngitsumik eqqissiviilliortinneqartarmata, Hans Enoksen erseqqissaavoq.

Assartuutit motoorinik ingerlatillit nunaannarmi atorneqarneri Namminersorlutik Oqartussat nalunaarutaat nr. 10 oktobarip 10-anneersoq, 2013-imeersoq Avatangiisit innarlitsaaliorneqarnissaannik Inatsisartut inatsisaani nr. 9-mi, 22. november 2011-meersumi tunngaveqartoq malittussaavaat. Kommunalbestyrelsi naalunaarut naapertorlugu Pinngortitaleriffimmit siunnersorneqareerluni snescooterit ukiukkut aqqutissaannik aalajangersaasinnaavoq.

Kommuneqarfik Sermersuumi snescooterinik ingerlateqartarnissamut maleruagassatut siunnersuut tusarniutigineqaqqammerpoq, malittarisassarli aalajangerneqartinnagu assartuutit motoorinik ingerlatillit nunaannarmi atorneqarnissaat inerteqqutaavoq.

- Kommunit ukiukkut aqqutissanik pinngortitamut ammaassisussanik kisianni aamma pinngortitamik uumasunillu illersuisussanik aalajangiinissaat pingaartutut isigivara. Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq.

Paasissutissat sukumiinerusut pillugit attavigiuk: Immikkoortortami pisortaq Amalie Jessen E-mail: amalie@nanoq.gl, Oqarasuaat; 34 53 45