Ikkatsimi avatangiisinut tunngasut pillugit Suka K. Frederiksen-ip qisuariaataa

Ikkatsimi sakkutooqarfiusimasumi avatangiisini saliinissaq pillugu Kalaallit Nunaata aamma Danmarkip akornanni isumaqatigiissummik atsioqatigiinnissaq pilersaarutaasimasoq, sapaatip akunnerata siuliani siusinnerusukkut Avatangiisinut Naalakkersuisuusup Mala Høy Kúko-p tusagassiorfinni arlalinni oqaatigaa.

”Erseqqissarusuppara Ikkatseq pillugu isumaqatigiissummik atsioqatigiinnissamik pilersaaruteqartoqarsimanngisaannarmat. Taamaalilluni ilumuunngilaq Ikkatseq pillugu isumaqatigiissuteqarnissaq uanga unitsissimagiga. Namminiilivinnermut, Pinngortitamut, Avatangiisinut Nunalerinermullu Naalakkersuisutut tamanna pillugu isumaqatigiissuteqarnissamik unitsitsinngilanga imaluunniit kinguarsaanngilanga ”, oqarpoq Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen.

Nunatsinni eqqakkat qimaannakkat isumagineqarnissaannut Naalakkersuisut sulissutiginninneranni, Tunumi Ikkatsimi sakkutooqarfiusimasoq sumiiffippassuit ilagaat. Sumiiffiit avatangiisaanni annertoorsuarmik avatangiisini sunniiviusimasutut nalilerneqartut aallunneqarnissaat pingaaruteqartoq Naalakkersuisut isumaqarput. Tassani taamaalilluni sumiiffiit mingutsinneqarnerpaasimasut siulliullutik saliivigineqassallutik. Taamaalilluni suliniuteqarneq avatangiisinut peqqinnissamullu sapinngisamik annertunerpaamik iluaqutaassalluni.

Naalakkersuisut isumaqarput sumiiffimmi aalajangersimasumi saliineq mingutsitsisumit ingerlanneqartariaqartoq aammalu mingutsitsisup akisussaaffigisariaqaraa. Tamanna aamma ”mingutsitsisup-akiliisussaaneranut-tunngaviusumut”, avatangiisinik allanngutsaaliuinermut inatsimmi tunngaviusutut pingaaruteqartutut ilanngunneqarsimasumut, naapertuutissaaq.

Annertunerusumik paasisaqarusunnermi saaffigineqarsinnaavoq Pisortaq Mette Skarregaard Pedersen, MESP@nanoq.gl oqarasuaat 34 51 22