Mittarfeqarfinni pisortaq nutaaq

Marie Fleischer Naalakkersuisut Marie Fleischer Mittarfeqarfinni pisortatut atorfimmut neqeroorfiginiarlugu aalajangerput. Marie Fleischer 1. juni 2017-imi atorfinissaaq.

Marie Fleischer ukiuni arlalinni aqutsinermik misilittagaqarpoq, kingullermik Kommuneqarfik Sermersuumi pisortaasimalluni. Kiisalu Marie Fleischer Cand. Scient. Adm.-itut, MBA-tut aamma HD-O-tut sulinermini tunuliaqutaqarpoq.

Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoq Múte B. Egede oqarpoq:

"Nuannaarutigaara Marie Fleischer Mittarfeqarfinni pisortatut atorfimmut neqeroorfiginiarlugu Naalakkersuisut aalajangermata. Marie Fleischer pisortaavoq pikkorissoq tunniusimasorlu pisortatut sulinermik misilittagaqarluartoq. Marie Fleischer-ip suleqatigilluarnissaanut qilanaarpunga.”

Mittarfeqarfinni pisortatut atorfimmut qinnuteqartut 58-iupput.

Annertunerusumik paasisaqarusunnermi Naalakkersuisoqarfimmi pisortaq Ruth Lindhardt tlf. 34 50 00-imut attaveqarfigineqassaaq.