Qeqertarsuup Tunuani sinerissap qanittuani qaleralinniarneq pillugu workshopertitsineq

Akisussaassuseqartumik isumannaatsumillu aalisalersoqarnissaata orninnerani ulluni apriilip 5-nit 7-aanut Qeqertarsuup Tunuani sinerissap qanittuani qaleralinniarneq pillugu workshopertitsisoqassaaq.

Workshopertitsisoqarnerani anguniarneqarpoq Qeqertarsuup Tunuani sinerissap qanittuani piffissami sivisuumi isumannaatsumik qaleralinniartoqalernissaata sulissutiginissaa. Aalisarnermik ingerlataqartut soqutigisaqartullu akornanni suleqatigiilluartoqalernissaa anguniarneqarpoq, tassanilu peqataassapput najukkami aalisartut, suliniaqatigiiffiit, kommuni, tunisassiortut, KANUAANA, Aalisarnermut Piniarnermullu Naalakkersuisoqarfik, Pinngortitaleriffik, Oceans North Greenland aamma tikeraat oqalugiartussallu Canadameersut.

Workshoppertitsineq peqataasussat qaaqqusat 55-it peqatigalugit ingerlanneqassaaq, ullormilu siullermi aqutsineq, qaleralinniarnermi sinaakkutissat, ilisimatuussutsikkut misissuinerit, nunatsinni nunanilu tamalaani aalisarnermi pisussaaffiit aalisartullu allat misilittagaqarfii sammineqassapput.  Ullut aappassaanni najugaqartut aalisarnikkut periarfissaat aallaaviussapput, tassanilu atortut, immikkut qassusersuutit, qassutinik kiviinnarnikunik aalisartuarneq, pitsaassuseq, tunitsiveqarneq tuniniaaviillu aalisartunit, kommunimit tunisassiortuniillu eqqartorneqassapput.  Ullut pingajussaanni suleqatigiit saqqummiinerat aamma ataatsimut anguniagassatut nalunaaruteqalernissamik sulineq sammineqassapput.   Taamaalillunilu anguniarneqassaaq ingerlataqartut tamarmik Qeqertarsuup Tunuani qaleralinniartoqarnerani akisussaaqataanertik takutissagaat, siunissamilu aalisarnerup ingerlaannarnissaanut suleqataanermut peqataallutik.

Workshopertitsineq najukkani, sumiiffinni nunalu tamakkerlugu akisussaassuseqartumik aalisartoqarnissaa pillugu siunissami oqallittarnissanut aallaaviusinnaavoq. Aalisarnermi isumannaatsumik aalisartoqarnissaa pitsaassuserlu qitiutinneqassasut siunertaavoq aamma aalisartut, biologit, aqutsisut suliffissuillu akornanni paaseqatigiissinnaaneq oqaloqatigiissinnaanerlu pingaartillugit.

Workshoppertitsineq KNAPK-mit, SQAKPK-mit, Aalisarnermut Piniarnermullu Naalakkersuisoqarfimmit, Pinngortitaleriffimmi aamma Oceans North Greenland-imit aaqqissuunneqarpoq. Workshoppertitsineq Ilulissani Hotel Arcticimi ingerlanneqassaaq.

Pingasunngornerup unnunnerani soqutiginnittunut tamanut ilisimatuussutsikkut siunnersuisarneq naleqqussakkamillu aqutsineq pillugit tamanut ammasumik Hotel Arcticimi nal. 19-21-mut paasissutissiisoqarniarpoq.