Ilisimasassarsiornissamut pilersaarut annertooq aallartinneqalerpoq

Stemningsbillede af Indlandsisen

Kalaallit Nunaanni Tunup Avannaarsuani avatangiisini ilisimasassarsiornissamut pilersaarut annertooq aallartinneqalerpoq

Tunup Avannaarsuani avatangiisini ilisimasassarsiornissamut pilersaarut aallartilerpoq. Pilersaarut pimoorussaavoq salliutinneqartussaq aammalu ilisimasassanik nutaanik pilersitsiviusussaq. Pilersaarummi sumiiffimmi uuliamik misissuinissamut pilersaarutit malittarisarissallu qanoq iliorluni pitsanngorsarneqarsinnaanersut paasiniarneqassaaq.

Pilersaarummi nunani tamalaani ilisimatusartunit siuttuusunik atuisoqassaaq. Kalaallit Nunaanni, Danmarkimi, Norgemi aamma USA-mi ilisimasassarsiorfiit arlallit peqataatinneqassapput.

Pilersaarummi suliat 20-t ingerlanneqassapput. Suliassat assigiinngitsorpassuit, imaani silaannarmilu ingerlanneqartussat suliarineqassapput.

Sumiiffiup iluani sumiiffiit suut uumassusillit ataqatigiinnerinut immikkut pingaaruteqarnersut nalunaarsuiffiusunik suliassaqassaaq. Taakku sumiiffiit immikkut ittumik illersortariaqarnerinut ilisimasassanik pingaarutilinnik pissarsiviusinnaapput.

Suliani allani akuutissanik avatangiisinut iluaqutaanngitsunut nungutitsiniaanermi periarfissanit paasisat annertunerulernissaat siunnerfigineqarpoq. Tamatumani avannaarsuani imaani uuliaarluertoqarpat akiuiniarnissaq siunertarineqarpoq.

Kiisalu immap iluani nipiliornerit immami uumasunut miluumasunut sunniutaannik misissuisoqassaaq. Immap iluani nipiliornermut ilaatigut sajuppillatsitsisarluni misissuinernit pisarput. Imartani sajuppillatsitsisarluni misissuisoqartillugu umiarsuaq nipip malingaasaanik sakkortuunik immap naqqanut aallartitsisarpoq, immallu naqqata iluani qaleriinnerit assigiinngitsut misissorniarlugit akisunnernik tigooqqaasarluni.

Uuliasiorfiit Kalaallit Nunaanni misissuinissamik aammalu uuliamik gassimillu atuinissamik kisermaassinissamut akuersissutinik pigisaqartut, Kalaallit Nunaanni uuliasiornermi gassisiornermilu avatangiisini pissutsinik ilisimasaqalernissamut tapiissuteqarnissaq pisussaaffigaat. Aningaasat taakku Aatsitassarsiornermut Aqutsisoqarfinnit aqunneqarput. Iisimasassarsiornissamut pilersaarut pillugu isumaqatigiissut, 60 millioner koruunit missaannik aningaasartaqartoq akuersissutinik pigisaqartut Aatsitassarsiornermullu Aqutsisoqarfiup, aammalu Aatsitassarsiornermi Avatangiisinut Aqutsisoqarfiup akornanni isumaqatigiissutaavoq. Aatsitassarsiornermi Avatangiisinut Aqutsisoqarfimmi siunnersortit, Pinngortitaleriffik aamma Aarhus Universitet-imi Nationalt Center for Miljø og Energi nunami namminermi nunanilu tamalaani suleqatit suleqatigalugit suliamik ingerlatsissapput.

Annertunerusumik paasisaqarusunnermi uunga attaveqartoqarsinnaavoq:

Aatsitassarsiornermut Naalakkersuisoqarfik
Naalakkersuisoqarfimmi pisortaq Jørgen Hammeken Holm, tlf: 346846, e-mail: joeh@nano.gl
(Uuliasiornissamut akuersissutit pillugit saaffiginnissutit)

Aatsitassarsiornermi Avatangiisinut Aqutsisoqarfik
Aqutsisoqarfimmi pisortaq Najaaraq Demant-Poort, tlf: 346834, e-mail: nade@nanoq.gl
(Avatangiisini ilisimasassarsiornissamut pilersaarut pillugu saaffiginnissutit)