Suleqatigiinnissamut isumaqatigiissut

Aalisarnermut Naalakkersuisoq Hans Enoksenip aamma Kommuneqarfik Sermersuumi borgmesteri Asii Chemnitz Narupip suleqatigiinnissaminnut nalunaarutaat

Tasiilami Inuussutissarsiutitigut periarfissat nutaat
Aalisarnermut Naalakkersuisoq Hans Enoksen aamma Kommuneqarfik Sermersuumi borgmesteri Asii Chemnitz Narup Tasiilami aalisarnermut inuussutissarsiornerup ineriartortinneqarnissaanut qulakkeerinnittumik suleqatigiinnissamut sisamanngornermi marsip 30-anni isumaqatigiissusiorput.

Aalisarnermut Piniarnermullu Naalakkersuisoqarfik Kommuneqarfik Sermersuullu suleqatigiinnerannut tunngaviuvoq, ataatsimoorlutik Tasiilami piniartutut inuussutissarsiuteqarnermiit aalisartutut inuussutissarsiuteqalernermut ikaarsaarnermik ajornannginnerulersitsinissaq.

Suleqatigiinnissamut nalunaarut inuussutissarsiutitigut suliniutinut pingaarnernut sisamanut agguataarneqarnissaa illuatungeriit isumaqatigiissutigaat. Isumaqatigiissummi siunniunneqarpoq, oqaatigineqartut iliuuseqarfigineqarnissaat, illuatungeriillu akisussaaffeqarfimminni ineriartortitsinissamut aporfiusinnaasunik annikillisaanissamik tapersersueqataanissaat.

Tasiilami tunitsivimmik pilersitsinissaq
Tasiilami nunaqarfinnilu aalisarnermik inuussutissarsiornerup ineriartortinneqarnissaanut tunitsivik ingerlalluartoq pisariaqartinneqarpoq. Suleqatigiit ataatsimoorlutik piaartumik tunitsivimmik pilersitsinissamut suliniuteqarsinnaasunut iliuuseqarnissaq siunertaraat, taamaalilluni inuussutissarsiutigalugu aalisarnermut periarfissat piginnaasallu atorluarneqarniassammata.

Inuussutissarsiutigalugu aalisarnermut pisassarititat
Siunissaq eqqarsaatigalugu Tasiilami eqqaanilu aalisarnerup patajaatsumik ingerlanneqarluni pilersinnissaanut aalisarnermut inuussutissarsiornermut toqqammaviit qulakkeerneqarnissaat pisariaqartinneqarput.

Tamanna pillugu Aalisarnermut Piniarnermullu Naalakkersuisoqarfimmit aamma Kommuneqarfik Sermersuumit, najukkami aalisartut suliffeqarfiillu aalisarnermut pisassiissutinik pisariaqartinneqartunik tunineqarnissaat, sulissutigineqassasoq isumaqatigiissummi ilanngunneqarpoq.

Aalisarnermut pisassiissutitigut aalisartut suliffeqarfiillu imminut akilersinnaasumik niuersinnaanissaat qulakkeerneqassaaq.

Najukkami suliffeqarfinnik pilersitsineq
Tasiilami suliffeqarfinnik pilersitsinissamut ineriartortitsinermut atatillugu aalisarnermut inuussutissarsiuteqarnerup ineriartortinneqarnissaa pingaaruteqarpoq.

Aalisarnermut Piniarnermullu Naalakkersuisoqarfimmit Kommuneqarfik Sermersuumiillu inuussutissarsiutigalugu aalisarneq periarfissaqarluartoq nalilerneqarpoq, taamatuttaaq tunitsiveqarneq najukkami inuiaqatigiinnut pitsaasumik sunniuteqarnissaa isumalluarfigineqarluni.

Tunitsivimmik aamma aalisakkanik suliffissuarmik pilersitsineq kiisalu aalisakkanik pisassiissutinik tunniussineq immikkoortumi sulisussaqareersumi, killilimmillu suliffissaqarfiusumi, suliffissaqarnerulersitsissaaq.

Aalisartunik, inuttanik aamma aalisakkerivimmi sulisunik piginnaanngorsaaneq
Tasiilami sulisussaqarpoq, aalisarnermullu tunngasunik pikkorissartitsinerit arlallit ingerlanneqareerlutik.
Taamaattorli Naalakkersuisoqarfimmit Kommunimiillu piniartutut inuussutissarsiuteqarnermiit aalisartutut inuussutissarsiornermut ikaarsaariarnermi qanoq sulisut piginnaanngorsartuarnissaannut atatillugu qulaajaasoqarnissaa suli pisariaqartinneqarpoq.

Anguniakkat piviusunngortinneqarnissaannut sulisut piginnaasaqarluartut pisariaqartinneqarput. Tamanna pillugu aalisartut, inuttat aamma suliffissuarmi sulisut naleqquttumik ilinniagaqarnissaat politikkikkut isumaqatigiissummi pingaarutilimmik inissisimavoq.

Namminersortunik suleqateqarneq

Aalisarnermut Piniarnermullu Naalakkersuisoq Hans Enoksenimit aamma Kommuneqarfik Sermersuumi borgmesteri Asii Chemnitz Naruppimit Tunumi aalisarnermik inuussutissarsiornerup ineriartortinneqarnerani namminersortut peqataatinneqarnissaat kissaatigineqarpoq. Tamatumani namminersortut pioreersut nutaallu tunitsivimmik suliffissanillu nutaanik pilersitsinissamut peqataarusuttut pineqarput.

Hans Enoksen          
Asii Chemnitz Narup
Aalisarnermut Naalakkersuisoq Borgmesteri
Kommuneqarfik Sermersooq

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq, Jørgen Isak Olsen. Mail: jio@nanoq.gl