ICC’p Economic Summit’iani Vittus Qujaukitsoq peqataasoq

Inuussutissarsiornermut, Suliffeqarnemrut, Niuernermut, Nukissiuuteqarnermut Nunanullu Allanut Naalakkersuisoq Vittus Qujaukitsoq Alaskami Anchoragemi ICC’p Economic Summitiani piffissami 28.-30. martsimi peqataavoq.

Vittus Qujaukitsoq oqarpoq, ”Issittumi suliffeqarfinnit kattuffinnillu kinguneqartitsisussatut siunnersuuterpassuit, tamarmik issittumi suliffeqarfiit akornanni qaninnerusumik suleqatigiinnissamut atasunik siuarsarnermut periarfissanik taakkartuuteqartut tusarnerat qiimmallannarpoq,” ilannguppaalu

”Nunat tamalaani Inuit Business Councilimik pilersitsisinnaanermik misissuinissaq, pinngortinneqassaguni suliffeqarfinni inissisimaffimmi suleqatigiinnermut nukittorsakkamut attaveqarfinnillu pilersitsinermut aallaaviusinnaasumik ataatsimiinnermi isumaqatigiissutiginerat soqutiginnillunga paasivara.”

Ataatsimeersuarnermi issittumi sumiiffiusumi sulisuusut suliffeqarfiit kattuffiillu ineriartortitsinissamut piukkunnaatinik suleqatiginnissamullu periarfissanik siunnersuuteqarput.

Suliffeqarfiit akornanni Alaskami uuliasiornermik ingerlatseqatigiiffiit siuttut ilaat – ConocoPhilips – taaneqarsinnaavoq, taassumalu issittumi sumiiffigisami ingerlatseqatigiiffiup suliarisaanik nassuiaavoq.

Royal Arctic Line’p suliffeqarfimmi periusissiani nutaaq saqqummiuppaa, taannalu ilaatigut Islandimi umiarsuaatileqatigiinnik Eimskip’imik annertuumik suleqatigiinnermik tunngaveqarpoq.

Saqqummiussinerit allat First Air’imit, The Mining Association of Canadamit allaniillu pipput. Tamarmik sammisaraat: Nunap immikkoortuani suleqatigiinnerup qanoq aningaasaqarnikkut siuarsarnermik suliffinnillu pilersitsinermik nukittorsaasinnaanera.

Tamakku saniatigut Kalaallit Nunaannit, Canadamit Alaskamillu sinniisuutitat nunat immikkoortuini ataasiakkaani inuussutissarsiorfinni suliarisanik siuarsaanermillu suliarisanik aallarnisagaasimasunik saqqummiussipput.

Annertunerusumik paasissutissarsioruit attavigiuk naalakkersuisup allattaa Akitsinnguaq Olsen oqarasuaat 58 89 19-ikkut.