Aalisakkat aalisartunut aalisartunngorumaartussanullu

- Ajuusaarutigaara avataani aalisakkat pisassiissutigineqarsimasut 10 procentinit ammasumik neqeroortitsiniarnitsinnut SIK aamma GE nalunaarutigisannut paatsoorsimammata, aalisakkat pineqartut tassaallutik qalerallit, saarulliit aamma suluppaakkat. Taakku inunnit ingerlatseqatigiiffiilluunniit pisassiissutinik pigisaqanngitsunit qinnutigineqarsinnaallutik, Aalisarnermut Piniarnermullu Naalakkersuisoq Hans Enoksen oqarpoq.

KNR sisamanngornermi marsip 30-anni 2017-imi allappoq SIK-p aamma GE-p Naalakkersuisunut ilaasortaq Hans Enoksen  unnerluutigigaat paasissutissanik eqqoqqissaanngitsunik saqqummiussisuunerarlugu,  pisassiissutit agguaanissaannut saqqummiussinermini.

- Kattuffiit piaaralutik nalunaarutiga sangutinniarsaralugu pivaat, aalajangersimanerarlunnga avataani pisassiissutit 10 procentii ilanngariarlugit umiatsiaararsortunut pisassiissutiginiarikka.  Tamanna eqqunngilluinnarpoq. Ajuusaarnaqaaq taama saqqummiussimmata. Naamminneerlutigukku eqqunngilluinnartunik saqqummiussisuusut, Hans Enoksen erseqqissaavoq.

Hans Enoksenip marsip 28-anni 2017-imi nalunaarutigisani erseqqissaassutigeqqippaa:

- Aaqqissuussineq, soorlu inuussuttunut sinerissap qanittuani allanullu aalisartunut iluaqutaakutsoorsinnaavoq, taakku ukiuni kingullerni aalisarnissaminnut tunngavissaqarsimanngimmata,  aningaasarsissutigisartagaat amerlanerpaajussanatik. Pisassaqarnermi ajorput aalisagartassat amerlanerpaartaat  ingerlatseqatigiiffinnit pigineqarmata.

- Oqaatsimilluunniit ataatsimik allassimasoqanngilaq 10 procentii umiatsiaararsortunut pisassiissutiginiarneqartut, Hans Enoksen erseqqissaavoq.

Aalisarnermut Piniarnermullu Naalakkersuisup Hans Enoksenip aalajangiusimalluinnarpaa avataani pisassiissutit 10 procentii aalisartunut imaluunniit ingerlatseqatigiiffinnut pisassaqanngitsunut pisassiissutigineqassasut.

- Imartatta pisuussutai uumassusillit inuiaqatigiinnit pigineqarput. Taakku ingerlatseqatigiiffinnut amerlanngitsunut pisassiissutaasimammata amerlanernut pisassiissutigineqartariaqalerput, Hans Enoksen oqarpoq.

Nunatta kitaani raajanut pisassiissutit agguaanneqarnerini sinerissamut qanittumi aalisariutinut 43 procentit pisassiissutaapput 57 procentii avataasiortunut pisassiissutaallutik. 

- Sinerissap qanittuani aalisariutit pisassatik ukioq naanngitsoq aalisartarpaat, pisassaarukkaangamik pituinnartariaqarlutik. 

Taamaattumik avataani pisassiissutinit pisassaqartinneqartariaqalerput. Aalisarutit pituinnarneqartarput ilisimallugu avataani pisassiissutit tamakkerlugit aalisarneqarsimanngitsut. Taamaattumik piffissanngorpoq pisassiissutigineqarsimasunit, nungunneqarsimanngitsunit, aalisarsinnaatitaalernissaat, Hans Enoksen erseqqissaavoq. 


Attavigineqarsinnaavoq Aalisarnermut Piniarnermullu Naalakkersuisoqarfimmi pisortaaneq Jørgen Isak Olsen. Email: jio@nanoq.gl.