Doris Jakobsenip Aasianni GUX-imi ilinniartitaanermut takorluukkat saqqummiuppai

Sisamanngornermi Naalakkersuisup Avannaani Ilinniarnertuunngorniarfik GUX pulaarpaa, tassanilu Naalakkersuisut ilinniartitaaneq pillugu takorluugaat aammalu ilinniartitaanermut nutarterinissaq ilinniartunut 200-nut ilinniartitsisuinillu saqqummiullugit.

Saqqummiussineq ilinniartut akornanni annertuumik soqutigineqarluarpoq kingornagullu periarfissinneqarlutik apeqqarissaarnissamut.

”Assut nuannaarutigaara, inuusuttut ilinniartitsisuisalu ilinniartitaaneq pillugu takorluukkat aammalu ilinniartitaanermut nutarterinissap ineriartorneranut taamannak annertutigisumik soqutigimmatigik. Tassami taakkua ilinniartut pineqarmata, taamaammat assut pingaaruteqarpoq ineriartornermi ilaatinneqarnissaat tusarniarneqarnissaallu,” oqarpoq Doris Jakobsen.

GUX Aasiaat pulaarneqarnera pivoq Doris Jakobsen qimussimik sukkaniunneq  Avannaata Qimussersua 2017 najuuffigiartorlugu Aasianniinnera iluatsillugu. GUX  Aasiaat pulaarneqarnerata saniatigut Naalakkersuisup meeqqat atuarfia Gammeqarfik aamma puulaarpaa kiisalu Ado Lyngep Atuarfia aamma pulaarneqarpoq.

 

 


Annertunerusumik paasisaqarniaruit attavigiuk Naalakkersuisup allattaa Rosa Thorsen oqarasuaat +299 55 33 03 imaluunniit e-mail rosat@nanoq.gl.