Ilulissani ataatsimeersuartitsineq

Ataatsimeersuartitsinissaq ”Qanga, nalitsinni aamma siunissami – saammaateqatigiinneq, ilinniarneq kulturikkullu immikkuullarissutsit” Ilulissani ingerlanneqassaaq ulluni 1.-2. april 2017. Saammaateqatigiinnissamut Isumalioqatigiissitap Perorsaanermik Ilinniarfik (SPS) suleqatigalugu ataatsimeersuarnissaq ingerlanneqartussaq aaqqissuussaraa.
Pisuni taamaattuni siullersaassaaq, qulequttat pissanganarput aammalu pissarsiaqarfiulluassallutik. Immikkut ilisimasallit, ilinniartut, eqqumiitsuliortut, ilisimatuut politikerillu ataatsimeersuarnermi ilisimasaminnik avitseqatigiissapput. 21-inik peqataasoqassaaq, ilaatigut Australiamiit, Hollandimiit, Norgemiit, Danmarkimiit Kalaallit Nunaanniillu aggersut assigiinngitsunik ilisimasaqartuusut tunuliaqutaqartuusullu. Ataatsimeersuarnerup saniatigut eqqumiitsuliortut Julie Hardenberg aamma Lisa Kreutzmann eqqumiitsuliatik SPS-imi saqqummersissavaat.
“Nuannaarutigaarput Perorsaanermik Ilinniarfik suleqatigalugu ataatsimeersuartitsissagatta. Isumalioqatigiissitami innuttaasut oqariartuutaat innuttaasunik ataatsimiisitsinikkut, apersuinikkut oqallissaariutigalunilu saqqummiisitsinikkut katersornikuuavut. Maannakkut immikkut ilisimasallit ilisimasaat katersussavavut, isumalioqatigiissitami sulinitsinni aamma tapertaasussat.” Taama oqaaseqarpoq Josef Therkildsen, Saammaateqatigiinnissamut Isumalioqatigiissitami siulittaasoq.

Soqutiginnittut tamarmik soqutiginartunut saqqummiinernut assigiinngitsunut tusarnaariarnissaminnut tikilluaqqusaapput. Ataatsimeersuarnissamut pilersaarut paasissutissallu sukumiinerusut Saammaateqatigiinnissamut Isumalioqatigiissitap nittartagaani www.saammaatta.gl aamma Facebookianut “Saammaateqatigiinnissaq”-mut aaneqarsinnaapput.

Attavissaq: Magdaline Møller, Allattoqarfik, mobil 55 98 01, E-mail: molm@nanoq.gl