Greenpeace kaffisoriartoqquneqartoq

Namminiilivinnermut, Pinngortitamut, Avatangiisinut Nunalerinermullu Naalakkersuisup Suka K. Frederiksenip aamma Aatsitassanut Ikummatissanullu Naalakkersuisup Múte B. Egedep Greenpeace kaffisoriaqqullugu imaanilu aatsitassarsiorluni misissuinermi qalluinermilu avatangiisini upalungaarsimanermut killissaliussat pillugit nutaarsiassanik paasissutissiiffiginiarlugu qaaqquaa.

Sapaatip akunnerata siuliani sinerissami annertunerusumik avatangiisini mingutsitsinermi danskit ikiuunnissamut periarfissaqassasut, Namminersorlutik Oqartussat aamma danskit naalagaaffiat isumaqatigiissuteqarput. Tassunga tunngatillugu Greenpeace oqariartuuteqarnermini Kalaallit Nunaanni uuliasiornermut tunngatillugu Danmarki sunniuteqaqataasariaqartoq tunngavilersuutitut atorpaa.

Kisianni Suka K. Frederiksen aamma  Múte B. Egede isumaqarput Greenpeace akulerussuisoq taamaattumillu avatangiisinut kattuffik kaffisoriaqqullugu aammalu akisussaffiit  killissaliussallu qanoq imminnut ataqatigiinnersut paasissutissiinissamut qaaqquneqarpoq:

Aatsitassarsiorluni ingerlataqarnernut Kalaallit Nunaat akisussaasuuvoq

– Aatsitassanut suliassaqarfik akisussaaffillu angerlaanneqarmata, aatsitassarsiorluni ingerlataqarnernut atatillugu avatangiisinut upalungaarsimaneq aamma imaani pissutsit tamakkiisumik akisussaaffigilerpagut, Naalakkersuisunullu ilaasortat nassuiaatigaat:

– Kalaallit Nunaanni 3-sømilini nunavittamut killeqarfiup iluaniittoq avataaniittorlu suli akisussaaffigigitsik.  Tamannalu  danskit illersornissamut ministeriata aamma Namminiilivinnermut, Pinngortitamut, Avatangiisinut Nunalerinermullu Naalakkersuisup isumaqatigiissutigisaanni allanngortinneqanngilaq.

Nangippullu:

– Nuannaarutigaara Greenpeacep oqariartuuteqarnerata qanoq iliortarnitsinnik nassuiaanissamut periarfissaqalersimmanga – pingaartumik misissuinermi immaqalu kingusinnerusukkut uuliamik qalluisoqalissagaluarpat upalungaarsimaneq qanoq isumagisassaanera pillugu nassuiaanissamut.

Suliffeqarfiit akiliisussaapput
– Ingerlatseqatigiiffiit uuliasiornissamik qinnuteqarniartut sioqqutsisumik avatangiisini ajornartorsiutinik sunilluunniit iliuuseqarfiginninnissamut naammattumik upalungaarsimasuutitaqareertussaapput. Tamatuma saniatigut aningaasaqarnikkut annertoorujussuarnik qularnaveeqqusiisussaapput, aningaasartuutit imaluunniit ajoqusiinerit ingerlataasa malitsigisimasinnaasaasa, inuiaqatigiinnut imaluunniit innuttaasunut nanertuutaannginnissaannik qulakkeerinnittumik. Taamaaliorsinnaanngippata Kalaallit Nunaanni suliaqarnissamut akuerisaassanngillat. Uagut inatsisit allaffissornerlu aquppavut, tassungalu atatillugu danskit naalagaaffiat aningaasartuuteqarsinnaanermik pisussaaffeqanngilaq.

Suka K. Frederiksen Múte B. Egedelu naggasiipput:

– Aatsitassarsiornermut atatillugu avatangiisinut pimoorussisumik soqutigisaqartut suulluunniit pingaartippakka, aamma Greenpeace – allallu – maleruagassat misissornissaannut aammalu aatsitassanik pisuussutitsinnik kalaallit kisimik susassaqarfigisaannik isumannaatsumik piiaasarnissaq qulakkeerniarlugu qanoq suliaqarnerput ingerlanneripput oqaloqatiginninnissamut tikilluaqqusaapput.


Paasissutissat annertunerusut ugguuna pissarsiarisinnaavatit:
Naalakkersuisoqarfimmi pisortaq Mette Skarregaard Pedersen, oqarasuaat 345122
Naalakkersuisoqarfimmi pisortaq Jørgen T. Hammeken-Holm, oqarasuaat 346846

Naalakkersuisup allattaa Naasunnguaq Olsen, oqarasuaat 345414/523614
Naalakkersuisup allattaa Jane P. Lantz, oqarasuaat 346839/597909