Nuummi atuarfeqarfinni atuartut angajulliit Namminiilivinnermut Naalakkersuisoq naapippaat

“Namminiilivinnermut tunngatillugu innuttaasunik ataatsimiititsigaangatta ilinniartitaaneq inuusuttullu oqallisaanerpaajusarput. Taamaattumik pingaartippara inuusuttut eqqarsaataat, erngumassutaat, qilanaarutaat qularnartoqartitaat uummammiuilu tusassallugit.” Namminiilivinnermut, Pinngortitamut, Avatangiisinut Nunalerinermullu Naalakkersuisoq, Suka K. Frederiksen inuusuttunut taama oqarpoq.

Ataasinngormat Nuummi atuarfeqarfiit tamarmik, arfiniliusut, atuartuutiminnik tallimanik Naalakkersuisumut Suka K. Frederiksenimut namminiilivinnissaq pillugu oqaloqateqartitsinissaminnik periarfissinneqarput. Naalakkersuisup pulaartoqarnini aallarnerlugu namminiilivinnissaq pillugu sulinermik nassuiaaqqaarpoq. Pulaarnermi pingaartumik ilinniartitaaneq oqallisigineqarpoq. Ilaatigut Namminiilivinnissap anguniarneqarnerani atuartitaanerup pitsaassusaata appasinnerulersinneqannginnissaa atuartuniit eqqumaffigineqartariaqarsorineqarpoq. Kalaallit oqaasiisa meeqqat atuarfiini pingaartinneqarnerisulli GU-mi ilinniarfeqarfinnilu allani pingaartitsisoqartariaqartoq aamma oqaatigineqarpoq. GU-mi atuarfinnilu allani ilinniartitsinermi qallunaat oqaasii pingaarnerpaasarput. Atuartut isumaqarput ilinniarnerminnik unitsitsiinnartartorpassuit tamanna peqqutigisaraat.

”Atuarfeqarfinni angusat Danmarkimut assersuusiortoqartarneq sanilliussisarnerlu ersippoq. Oqallisigineqarsinnaalluarpoq ilumut naleqqutuunginnersoq nunarsuarmioqataasutut sanilliussisarnissaq?” naggasiinermini Naalakkersuisoq Suka K. Frederiksen oqaatigaa.

Atuartut Naalakkersuisumik oqaloqateqarnerminnit eqqarsaaterpassuaqalersimapput tusarnaarneqarnertillu nuannaarutigalugu. Taamatuttaaq Naalakkersuisup inuusuttut namminiilivinnissamut eqqarsaataannik ilisimasaqarnerulerami pulaarteqarnini nuannaarutiginerarpaa.
Naalakkersuisup namminiilivinnissaq pillugu utoqqarnik meeqqallu atuarfiini atuartunik naapeqateqartarnissani ingerlatiinnassavaa, aamma sinerissami.


Annerusumik paasisaqarusukkuit Naalakkersuisup allattaa attavigiuk: Naasunnguaq Olsen, tlf, 345414, e-mail: nasu@nanoq.gl