2017-mi Ilaqutariinnut sullissivinnut immikkut aningaasaliissuteqarneq

Naalakkersuisut Inatsisartut Aningaasaqarnermut Akileraartarnermullu Ataatsimiititaliaanut qinnuteqarsimapput, taakkulu akuersissuteqarneratigut ilaqutariinnut sullissiviit 2017-imi tapiiffigineqarnissaannut immikkut aningaasaliissutinik 3,0 mio. kr.-iusunik immikkoortitsisoqassasoq aaliangiunneqarpoq.

Nuna tamakkerlugu ilaqutariinnut sullissiviit 16-it maanna ingerlanneqarput, taakkunanilu siunertarineqarpoq meeqqanut atugarliortunut ilaqutaannullu siusissukkut aal-lartittumik suliniutinik pinaveersaartitsiffiusunik qulakkeerinninnissaq. Ilaqutariinnut sullissiviit kommuninit ingerlanneqartut ilaqutariinnut sullissiviit ingerlannerannut tapiiffigineqarnissamik Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfimmut qinnuteqarnissamut periarfissaqarput.

Ukioq manna qinnuteqarfiusussami ilaqutariinnut sullissivinnut aningaasat qinnutigineqartut 2017-imut aningaasanut inatsimmi siunertamut immikkoortinneqartut qaangersimavaat. Ilaqutariinnut sullissiviit meeqqat inuusuttullu taakkualu ilaqutaannut pina-veersaartitsiffiusumik tamakkiisumillu suliniuteqarnissamut pingaaruteqarluinnarput, taamaammallu Naalakkersuisunut qulakkiissallugu pingaaruteqarsimavoq ilaqutariinnut sullissiviit qinnuteqaataasa suliamut attuumassuteqartut tapiissuteqarfiginissaanni naammattunik aningaasassaqarnissaa.

”Isumaginninnermut tunngasunut akisussaasuulluni meeqqanut inuusuttunullu, taakkualu ilaqutaannut atugarliortunut pinaveersaartitsiffiusunik tamakkiisumillu isiginnilluni suliniuteqartarneq ilaqutariinnut sullisivinni taama pingaartinneqartigimmat takusinnaallugu nuannerpoq.” Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoq Sara Olsvig ilaqutariinnut sullissivinnut immikkut tapiissutigineqarnermut oqarpoq.

Aningaasat immikkut tunniunneqartut aqqutigalugit suliaqarfimmi suliniutit annertusaaffigineqarsinnaassapput, taamaalillutillu ilaqutariit atugarliortut ullutsinnut sanilliullugu siusinnerusukkut katsorsarneqarsinnaanerat periarfissaqalissammat. Taamaalilluni suliniutigineqartoq annertusineqassaaq, paaqqinniffinnullu inissiisarnernut pinaveersaartitsiffiusumik aaqqiissutissat allatullu iliorsinnaanerit pineqarnerulerlutik, ilaatigullu taamaaliortoqarsinnaavoq ilaqutariinnut højskolertitsinerit immikkut piareersakkat, ilaqutariillu ineriartornissaannut pikkorissartitsinerit aqqutigalugit, tamakkulu ilaqutariinni meeqqanik inissiisoqarnissaanut ulorianartorsiorfiusuni ilaqutariinnut pinaveersaartitsiffiusumik suliniuteqarnissami pingaaruteqarluinnarput.

Paasissutissat allat naalakkersuisup allattaanut uunga pissarsiariniarneqarsinnaapput: Nina Jul Larsen, e-mail: nina@nanoq gl, oqarasuaat: +299 53 93 71