Meeqqanik annersaasarneq pillugu ilinniagaqartunik sulisunillu ilinniarsimasunik ilinniartitsineq

Nuummi ilinniarsimallutik sulisut pikkorissartut assingat

 

Sapaatit akunnerisa aqqaneq aappaanni Isumaginninnermullu, Ilaqutariinnermut, Naligiissitaanermut, Inatsisinillu Atuutsitsinermut Naalakkersuisoqarfiup sulianik ilinniagaqarsimasunut ilinniagaqartunullu ilinniartitsineq aallartippaa. Ilinniartitsinikkut siunertaavoq meeqqat angerlarsimaffinni nakuuserfiusartuni alliartortarnissaasa nakuusernerullu malitsigisaanik atugaqarlutik inuusariaqartarnerisa pinaveersaartinneqarnissaannut suliamik ilinniagaqarsimasut piginnaanngorsartinneqarnissaat.

Sulianik ilinniagaqarsimasut pingaartumik ulluunerani paaqqinnittarfinneersut, meeqqat atuarfianeersut aamma ilaqutariinnut sullissivinneersut peqataapput ilinniagaqartunillu ilinniartitsinermi ilinniartitsisunngorniartut, peqqissaasunngorniartut inunnillu isumaginnittunngorniartut peqataallutik.

Ilinniartitaaneq Nuummi aallartippoq ilinniagaqartunik 120-it peqataaffigineqarluni sulianillu ilinniagaqarsimasunik 30-it peqataaffigineqarluni. Sapaatit akunnerisa 13-ianni ilinniartitsineq Ilulissani aallartinneqassaaq, tassanissaaq ilinniagaqartut Perorsaanermik Ilinniarfimmeersut taamatullu sulianik ilinniagaqarsimasut ilinniartinneqassallutik.

Ilinniartitaaneq sulianik ilinniagaqarsimasunut pingasunik ingerlariaqqiffeqarpoq ilinniagaqartunullu marlunnik ingerlariaqqiffeqarluni. Ilinniartitsinerit allat maajimi aggustimilu 2017-imi Nuummi Ilulissanilu piumaarput.

Ilinniartitsinikkut ilinniagaqartut sulianillu ilinniagaqarsimasut qanigisani nakuusertoqartarneranik ilisimasanik ataatsimoorlunilu tunngavissanik nutaanerpaanik aamma nakuusertarnermik ajornartorsiutaasut ataatsimoorluni paasineqartarnissaannik tuniniarneqarput, taamaalilluni pisortani sulianik ilinniagaqarsimasut suliassat aaqqissuussaanikkullu inissisimanerit apeqqutaatinnagit meeqqanik annersaasarneq pillugu suliani sumiissusersiuisarlutik akuliuttarlutillu pitsaanerusumik suleqatigiilerniassammata.

Ilinniartitsinerit Naalakkersuisut 2014-2017-imi annersaasarnermut ilioriusissaasa iliuuserineqartussanullu pilersaarutaasa atuutsinneqalernissaannut ilaapput ilinniartitsiniarlunilu sulissutigineqartunik allanik soorlu Suliniut Kattunnermik, qimarnguinni misilittakkanik paarlaasseqatigiittarnikkut aamma nammineq piumassutsiminnik sulisunik piginnaanngorsaanikkut aapparisanik annersaasarnermut akiuiniarnerup nukittorsarneqarnissaanik siunertaqartunik, ingerlatitseqqinnerullutik.

Annertunerusunik paasisaqarusukkuit attaveqarfigiuk AC-fuldmægtig, Ditte Enemark Sølbeck, e-mail: ditt@nanoq.gl aamma oqarasuaat +299 34 60 37