Nuummi anorersuaraluaqisoq Namminersulivinneq pillugu oqallittoqarluarpoq

Namminiilivinnermut, Pinngortitamut, Avatangiisinut Nunalerinermullu Naalakkersuisup Suka K. Frederiksen-ip marlunngorneq 21. marts innuttaasunik ataatsimiititsivoq. Oqallissaarutimini annikitsumik saqqumiuppaa 1953-imi kalaallit oqartussaassuseqarnermik piumasaqalerlutik alloriarnerat. Saqqummiussinerillu naggaserlugit imaattumik oqaaseqarluni:” Apeqqusserneqarsinnaavoq 1953-miit ullumikkumut apeqqutit pillugit nikittoqarsimanersoq? Taamani ullumikkullu oqallisigisat, kissaatigisat suli, namminiilernissamut tunngasuupput.”

Eqimattani oqallisereernermi peqataasut akornanni apeqqutit saqqummiunneqartut ilaat:

  • Namminiilivinnissaq utaqqissunneqartariaqanngitsoq, ilaallu ukiumik aalajangiisoqartariaqartoq kaammattuutigalugu
  • Atuartitaaneq, angajoqqaallu akisussaanerusariaqartut – ilinniartitaanerit aalisakkerinernut samminerusariaqartut nunatta aningaasarsiornera tassanga aallaaveqarmat.
  • Nunatta pissarititaa pisuussut annerpaaq tassaasoq INUK.
  • Niuernermi siunertaqarluni aallarnissaanermi oqinnerusunik atugassartitsisoqartariaqartoq
  • Nunarput qimallugu nutsertartut nunatsinni pisariaqartippagut – utertinneqartariaqartut suliffissanik pilersitsinikkut inuuniarnermilu atukkat pitsaanerusut pilersillugit.
  • Allaffeqarneq akisuallaartoq annikillisarneqartariaqartorlu – ass. illoqarfiup ataatsip allaffimmiui naammattut nunatsinnut tamakkiisumut sullississallutik.
Peqataasunit inuusunnerusuni kissaatigineqarpoq isornartorsiuisoqartillugu nalileereertarneq unitsinneqartariaqartoq. Tapersersuigaluarluni apeqqusersuisoqarsinnaasoq utoqqaanerusunit akuerineqartariaqartoq oqariartuutigineqarpoq.

Naalakkersuisoq Suka K. Frederiksen naggasiinermini oqariartuutigaa:” Naalakkersuisunit namminiilivinnissaq siunnerfigineqarpoq, toqqammavissallu sanarfineqalerput, taakkulu namminiilivinnermi tunngaviusussaapput.”

Annertunerusumik paasisaqarusunnermi naalakkersuisup allattaa Naasunnguaq Olsen, tlf, 345414-imut, e-mail: nasu@nanoq.gl attaveqarfigineqassaaq