Kalaallit Nunaata EU-llu akornanni suleqatigiinnissamut isumaqatigiissut nalilersorneqarnera pillugu tamanut ammasumik tusarniaaneq

2014-2020-mut Europæiske Unionip avataani aningaasalersuisarnermut atortuinik (EFI) EU piffissap qiteqqunnerani nalilersuilluni aallartissimavoq. Tassunga ilaavoq Kalaallit Nunaannut aningaasalersuisarnermi atortumik imaluunniit nalunnginneqarnerusumik taaguutilik Kalaallit Nunaat EU-llu akornanni suleqatigiinnissamut isumaqatigiissut pillugu nalilersuineq.

Nalilersuinerminut atatillugu EU soqutiginnittunut tusarniaatitsivoq. Tusarniaanerlu maajip 3-nut 2017 killeqartinneqarluni.

Tusarniaanermi siunertarineqarpoq soqutiginnittunit sapinngisamik amerlanerpaanit taakkununnga ilanngullugit nunanit tigusisartunit aamma EU-mi nunanit soqutiginnittunit isumassarsiaasinnaasunik/ilangussassanik katersinissaq, taakku nalilersuinernit nutaamik inerniliigallarnernut qisuariaataat tusarniarlugit. Ilanngullugu neriuutigineqarpoq maanna aningaasalersuisarnerup ulloq 31. december 2020 atorunnaareerneratigut siunissami aningaasalersuisarnermut atortunut, ilaangullugu Kalaallit Nunaannut aningaasalersuisarnermi atortumik aaqqissuussisinnaaneq pillugu isumaagallartunik katersinissaq.

Kalaallit Nunaannut aningaasalersuisarnermi atortoq (Siunnersuisoqatigiit 2014/137 / EU-mi aalajangiinerat), atortuusoq, Kalaallit Nunaata, Danmarkip aamma EU-p akornanni pissutsinik iluarsiissutaasartoq asseqanngilaq. Taassuma toqqammavia naalakkersuinikkut Siunnersuisoqatigiinnut (Europap Siunnersuisooqatigiivi) isumaqatigiissutaavoq. Siunertaavoq Kalaallit Nunaata Europamiut Ataatsimooqatigiiffiannit qimatsereernerani illuatungeriit akornanni qanimut ataavartumillu attaveqarnerup pigiinnarneqarnissaa taannalu 1985-imi EF/EU-p Nunap Imarpiup Illuatungaaniittoq Nunasiaataasimasumullu suleqatigiiffianut (OLT) atassuserneqarpoq.

Piffissami 2014-2020-mi Kalaallit Nunaannut aningaasalersuisarnermi atortoq aqqutigalugu EU-p 217.800.000 €-t Kalaallit Nunaannut ingerlatinniarpai. Kalaallit Nunaannut aningaasalersuisarnermi atortumut atatillugu suleqatigiissutaasinnaasutut taaneqartut ukuupput ilinniartitaaneq, pinngortitami pisuussutit (taakkununnga ilanngullugit aatsitassat), nukissiorneq, silap pissusii, issittumut tunngatillugu apeqqutit, isumaginninnermut tunngasut aamma ilisimatusarneq / isumassarsiullaqqinneq. Pilersaarusiornermi uppernarsaammik taaneqarsinnaasumi ilinniartitaaneq qitiusutut tikkuarneqarpoq, tamannalu Europa-Kommissionip aamma Kalaallit Nunaata akornanni isumaqatigiissutigineqarluni aalajangiunneqarpoq.

Soqutiginnittut tamarmik tusarniaanermi akissuteqaatinik nassiussisinnaapput. Ilanngussassat link una atorlugu nassiunneqassapput: https://ec.europa.eu/eusurvey/runner/PCEFI

Kalaallit Nunaata Bruxellesimi Sinniisoqarfianit Namminersorlutik Oqartussanit tassungalu atasumik tusarniaanermi akissutit tamarmik katersorneqassapput.

Dokumentit kalaallisoortut tuluttoortullu link una atorlugu nanineqarsinnaapput: http://ec.europa.eu/europeaid/public-consultation-external-financing-instruments-european-union_en

Annertunerusumik apeqqutissaqaruit attavigiuk: Sinniisoqarfimmi pisortaq, Mininnguaq Kleist tlf. nr. +32 499 99 98 58, E-mail: mikl@nanoq.gl