Inatsisinik atuutsitsinermut tunngasut pitsanngorsaavigineqartuassapput

Inatsisinik atuutsitsinermut tunngasut pitsanngorsaavigineqartuarnissaat Kalaallit Nunaata piumasaraa

Kalaallit Nunaanni Inatsisinik Atuutsitsinermut tunngasut tusarniaanermi Christiansborgimi ingerlanneqaqqammersumi immikkut sammineqarput. Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisup oqaatigaa ukiut kingulliit ingerlaneranni siuariartoqarsimasoq, sulili sorpassuartigut malunnaatilimmik pitsanngorsaasoqartariaqartoq. Ilaatigut pitsanngorsarneqartariaqartut tassaapput pineqaatissinneqarsimasunik inissiisarfinni paarsisut ilinniartitaanerannik annertusaanissaq, pineqaatissinneqarsimasunik inissiisarfiit illutaasa pitsanngorsartuarneqarnissaat, eqqartuussivinni illersuisut ilinniartitaanerannik annertusaajuarnissaq, aammalu inatsisit nunatsinni pissutsit aallaaviginerullugit suliarineqartarnissaat.

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisup Sara Olsvigip tusarniaanerup kingorna oqaatigaa, "Namminersorneq pillugu inatsimmut atatillugu erseqqilluinnartumik isumaqatigiissuteqarpugut suliassaqarfiit Danmarkimit suli oqartussaaffigineqartut pitsaassusaat Danmarkimi pitsaassusiannut naapertuuttunngortinneqassasut. Tamanna Inatsisinik Atuutsitsineq eqqarsaatigalugu suli anguneqaqqajanngilaq, taamaammallu tamakkunatigut pisariaqartitsiffiunerpaat ilaasa immikkut saqqummiunnissaat pingaartippara", nangillunilu "Kalaallit Nunaata anguniagassatut piumasaasa periarfissani massakkutut ittuni taamaallaat saqqummiunneqartannginnissaat siunertaralugu Inatsisinik Atuutsitsinermut tunngasutigut Kalaallit Nunaanni periusissiortoqarnissaq aallartippara. Periusissiap Kalaallit Nunaata suliassaqarfiup ineriartortinneqarnissaani pingaarnerutitai, piumasaqaatai naatsorsuutigisaalu suliap takutissavai."

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisup Sara Olsvigip tusarniaanermi saqqummiussinini naggaserlugu erseqqissarpaa, politiit inissiisarfinnilu paarsisut danskit kalaallillu akissarsiamikkut assigiinngitsunik atugaqartitaanerat akuersaarneqarsinnaanngitsoq, taamaanneralu piaarnerpaamik kipitinneqartariaqartoq.

 

Naalakkersuisup allattaanut Nina Jul Larsenimut saaffiginnittoqarsinnaavoq, oqarasuaat 539371-imut.