Kujataani aalisartut kattullutik aalisarlik

"Kujataa aalisagaqartoorsuunngimmat aalisartut piginneqatigiillutik aalisariummik avataasiorsinnaasumik peqalertariaqarput. Aalisartut misigisimapput aalisariutinut allaneersunut imartaminni aalisartunut isiginnaartuuginnarlutik.

Taamaattumik kajumissaarpakka piginneqatigiiffimmik pilersitseqqullugit, aalisariummik avataasiorsinnaasumik peqalersinnaaqqullugit," taama Aalisarnermut Piniarnermullu Naalakkersuisoq, Hans Enoksen, nunatta kujataata illoqarfiini sapaatip akunnerata matuma siuliani angalaartoq oqarpoq.

Kujataani sinerissap qanittuani aalisarneq ukiuni kingullerni unittoorluinnangajaqqavoq.

Qaqortumi, Narsami Nanortalimmilu umiatsiaararsortut tunitsivinnut tunisinissaminnut periarfissaqarput.  Aalisartut  tunisartagaat amerlagisassaanngillat, aalisarfigisartagaanni aalisakkat pisarineqarsinnaasut amerlasoorsuunngimmata. 

Narsarmili umiatsiaararsortut illoqarfinnut allanut sanilliullugit tunisartagaat amerlanerulaarput, Narsap eqqaa aalisagaqalaarnerummat.

"Kujataani aalisartut siunissami kinguussaavallaartinneqassanngippata nutaamik aaqqissuussivigineqartariaqarput. Nutaaliornerit ilaat tassaasariaqassaaq avataasiorsinnaasumik aalisariutitaarnissaat,  pisat aalisariummi tunisassiaralugit suliarineqarsinnaasassallutik, ilaalli nunami tunisassiorfinnut tulaanneqartassallutik. Takorloorpara piginneqataasussat tassaassasut aalisartut," Naalakkersuisoq Hans Enoksen oqarpoq.

Raajat

Kujataani ukiuni kingullerni raajarniartoqanngilaq.

Hans Enoksen isumaqarpoq sinerissap qanittuani raajaqassuseq misissorlugu misileraasoqarsinnaasoq, akilersinnaasumik tunisassiarineqarsinnaanissaa qulakkeerumallugu.

"Aalisartut ukiuni kingullerni naammattoortuaannarpaat aalisakkat aqajaruini raajaqartoq, taamaattumik isumaqarpunga misileraanissamut tamanna tunngavissaqarluartoq," Naalakkersuisoq Hans Enoksen oqarpoq.

Kujataani raajanut tunitsiveqanngilaq.

"Piujuaannartitsineq tunngavigalugu raajarniartoqarsinnaalissappat raajarniutit pisatik namminneerlutik aalisariummi tunisassiarisariaqassavaat, piumasaqaataasinnaalluni ilaatigut pisat ilaat nunami suliffissuarnut tulaanneqartassasut," Naalakkersuisoq Hans Enoksen oqarpoq.

Kapisillit eqaluillu

Kujataani aalisartut peqatigiiffiisa kissaatigivaat, aalisartut aalisakkanik amerlasuunik tunisassaqannginnertik pissutigalugu, kapisillit aamma eqaluit tunisaasariaqartut.

"Neriuppunga kissaataat piviusunngortinneqarumaartoq, nunatta sinnerani aalisartutulli allatut periarfissarpassuaqanngimmata," Naalakkersuisoq Hans Enoksen oqarpoq.

Hans Enoksenip kujataaniinnermini ilaatigut takusagaa tassaavoq Nanortalimmi aalisakkerivik.

"Nuannaarutigaara aalisakkerivimmi sulisut amerlasuut sulisinnaammata. Taama amerlatigisut sulisinnaanerinut pissutaasoq annerpaaq tassaavoq aalisakkat aalisakkerivimmi suliarisinnaasunngorlugit pisassiissutigineqarsimammata", Naalakkersuisoq Hans Enoksen oqarpoq.

Kujataani aalisartut aalisarsinnaanermut immikkut akuersissummik tunineqartarnissaannik suliniuteqassalluni Hans Enoksen erseqqissaavoq. Aalisartut maannakkut akuersissuteqartut  ukiumit ukiumut akuersissummik tunineqarsinnaasarput.

"Siunnersuutiga akuerineqasappat kujataani aalisartut immikkut akuersissummik tunineqarsinnaasalissapput, ukiup  siuliani akuersissuteqarsimanngikkaluarlutik. Peqqussut naapertorlugu akuersissummik tunisisoqarsinnaasarpoq ukiup siuliani aatsaat akuersissummik tunisisoqarsimatilluni," Naalakkersuisoq Hans Enoksen oqarpoq.

Hans Enoksenip kujataani angalanermini takuniagai ilaatigut tassaapput Narsami Neqi A/S aamma Nanortalimmi aalisakkerivik.

Naalakkersuini ilaasortap illoqarfinni aalisartut piniartullu peqatigiiffiannik ataatsimeeqateqartoq ugguarpoq nunaqarfinnut tikissinnaasimannginnami angallannikkut pissutsit killeqartitsimmata.

 

Paasisaqarnerorusuttut attavigisinnaavaat Jørgen Isak Olsen, Aalisarnermut Piniarnermullu Naalakkersuisoqarfimmi pisortaq, e-mail jio@nanoq.gl.