Innuttaasunik ataatsimiititsinerit naammassilluartut

Naalakkersuisut Siulittaasuata Kim Kielsenip ulluni sisamani kingullerni Sisimiuni, Ilulissani, Qasigiannguani Aasiannilu innuttaasunik ataatsimiititsimmat inuit katillugit  200-ut missaanniittut takkupput. Ataatsimiititsinernut takkuttut Naalakkersuisut sulinerat anguniagaallu pillugit oqaluttuunneqarput, kingornalu apeqquteqarnissamut oqaaseqarnissamullu periarfissaqarluartinneqarlutik.

Sisimiuni innuttaasunik ataatsimiititsinermit tusagassiorfinnut nalunaarut atuaruk

Qeqertarsuup Tunuani innuttaasut nalinginnaasumik sammivaat soraarnerussutisiat pillugit atukkat, takornariaqarnermi aalisarnermilu inuussutissarsiutinik inerisaaneq, ilanngullugu aalisakkat tulaassorneqartut nalitusarneqartarnissaat, ingerlatseqatigiiffiit namminersortunngorsarneqarnissaat, sanaartugassat inissiat, atuarfiit, umiarsualiviit minnerunngitsumillu mittarfiit sammineqarlutik, Ilulissani mittarfiup tallineqarnissaa inoqarfinnilu mikinerni ujaraaqqanik mitarfiliornissat ilanngunneqarlutik.

Innuttaasulli aamma apeqqutigaat suliffinnik Nuummiit sineriammut qaqugu nuussisoqassanersoq, marlunnik qinigaaffeqarneq, qinikkat qaqugu immikkut ilisimasalittut pissuseqarunnaassasut, meeqqat atuarfiannit amerlanerusut ilinniagaqalernissaat pillugu Naalakkersuisut qanoq suliniuteqarnersut, kalaallit ilinniarsimasut qanoq angerlartinneqarsinnaanersut avataaniillu eqqussuineq annikillisarniarlugu imminut pilersornerulernissarput.

Toqqaannartumik aamma oqaaseqarfigaat sulineq imminut akilersinnaasariaqartoq, meeqqat kaattut nungusarniarlugit sulisoqartariaqartoq aalisakkanillu tunisassiornermi nunarput siuttuusinnaasoq.

Naalakkersuisut Siulittaasuat Kim Kielsen oqarpoq:

”Innuttaasunik ataatsimiititsinerit ingerlalluarput takkuttullu Naalakkersuisut sulinerannik anguniagaannillu soqutiginninnertik takutippaat najukkaminnilu ulluinnarni unammilligassat atukkatik pillugit apeqqutissaqarluarlutik. Assersuutigalugu Ilulissani, Qasigiannguani Aasiannilu apersuutigineqarpoq soraarnerussutisiat aaqqissuuteqqinneqarnerata imarisaa. Aapparisap isertitaa apeqqutaatinnagu soraarnerussutisiaqarneq nalornissutigineqarpoq. Apeqqutit tamakku Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfimmut anngutissavagut. Soraarnerussutisiat aaqqissuuteqqinneqarnerannut atatillugu soraarnerussutisiallit pisinnaatitaaffitik pillugit nalornissuteqassanngillat.”

Naalakkersuisut Siulittaasuata illoqarfinnut nunaqarfinnullu allanut aamma tikinnissani pilersaarutigaa. Pilersaarutit piareeraangata innuttaasunut tusarliunneqartassapput.

 

Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist mobil +299 559424 imaluunniit e-mail paok@nanoq.gl.